Tımýr Súleımenov tsıfrlyq aktıvter naryǵynda sheshilýge tıis máselelerdi atady

— Birinshi — básekege qabiletti salyqtyq jaǵdaı. Dástúrli qarjy naryǵy men tsıfrlyq aktıvter naryǵyna biryńǵaı salyqtyq tásil qajet. Bul operatsııalar men kapıtaldy retteletin ortaǵa qaıtarýǵa, ishki naryqty damytýǵa jáne halyqaralyq qatysýshylardy tartýǵa jaǵdaı jasaıdy. Ekinshi — banktik overkomplaens. Jeke klıenttiń nemese operatsııanyń táýekeli lıtsenzııalanǵan provaıderdiń barlyq shottaryn buǵattaýǵa ákelmeýi kerek. Shekteýler tek naqty táýekelge qatysty qoldanylýǵa tıis. Ol úshin bankterge Ulttyq krıptoanalıtıka ortalyǵynyń quraldaryna qol jetkizý qajet. QMA men QNRDA Ulttyq bankpen birge táýekelge baǵdarlanǵan qarjylyq monıtorıngtiń naqty ári biryńǵaı qaǵıdalaryn belgileýge tıis, — dedi ol.

Ulttyq bank tóraǵasy úshinshi tokendeýdi damytý qajettigin aıtty. Bul rette, sapaly aktıvter men iri shyǵarylymdar jetkilikti bolǵanda ǵana naqty ekonomıkalyq nátıje bolady. Salalyq memlekettik organdarmen birlesip olardyń tizimin qalyptastyrý qajet. Oǵan memlekettik baǵaly qaǵazdar, memlekettik borysh quraldary men korporatıvtik oblıgatsııalar sııaqty aktıvter kirýi kerek. Sondaı-aq jyljymaıtyn múlik, ınfraqurylymdyq jobalar men ken oryndary sııaqty naqty aktıvterdiń tizbesin keńeıtý qajet.

— Qarjy mınıstrligine, «Samuryq-Qazyna», «Báıterek» qorlaryna, KASE men Ortalyq depozıtarııge alǵashqy iri shyǵarylymdardy daıyndaý qajet dep sanaımyz. Tek osy jaǵdaıda tokendeý kapıtal tartýdyń jańa arnasyna aınalady. Tórtinshi — úsh ıýrısdıktsııanyń áleýetin ashý. Jalpyulttyq rejım, AHQO men Alatau City bizge naryqty damytý úshin ártúrli retteýshilik rejımderdi paıdalanýǵa múmkindik beredi. Olardy básekeles emes, biryńǵaı ekojúıeniń birin-biri tolyqtyratyn elementteri retinde qarastyrý qajet, — dedi Tımýr Súleımenov.

Onyń atap ótýinshe, ıýrısdıktsııalar arasyndaǵy praktıkalyq ózara is-qımyldy kúsheıtip, jobalardy birge damytyp, naryq qatysýshylary úshin kedergisiz tetikter qurý qajet. 

— Bul áleýetti odan ári ashý úshin retteýshiler arasyndaǵy ózara is-qımyl tetikterin bekitý qajet. Osy maqsatta Ulttyq bankke, QNRDA-ǵa, AHQO men Alatau City-ge birlesken jobalardy iske asyrý kezindegi ózara is-qımyldy, aqparat almasýdy, tsıfrlyq aktıvter men provaıderlerdi ózara tanýdy, sondaı-aq qadaǵalaý qyzmetin úılestirýdi kózdeıtin Bas kelisimdi jasasýdy jedeldetý qajet dep esepteımiz, — dedi UB tóraǵasy.

Aıta keteıik, Úkimet otyrysynda tsıfrlyq aktıvter salasyn damytý máseleleri talqylanyp jatyr.