Tımýr Súleımenov teńgeniń nyǵaıýyna túrtki bolǵan sebepterdi atady
ASTANA. KAZINFORM – Ulttyq bank tóraǵasy Tımýr Súleımenov bazalyq mólsherlemeniń tómendeýi men munaı baǵasynyń arzandaýy aıasynda teńgeniń nyǵaıýyna qatysty pikirin bildirdi.
Tımýr Súleımenovtiń aıtýynsha, ulttyq valıýtanyń AQSh dollaryna qatysty álsireýine negiz bolatyn alǵysharttar joq.
— Bizde alǵysharttardyń biri ǵana: bazalyq mólsherleme 17 paıyzǵa deıin tómendetilgennen keıin teńgelik aktıvterdiń tartymdylyǵy quldyrap, dollar baǵamy kúrt ósedi degen pikir aıtyldy. Alaıda, bul oryn alǵan joq. Baǵam burynǵydaı 487–488 teńge shamasynda saýdalanyp jatyr, — dedi Ulttyq bank tóraǵasy Senattyń jalpy otyrysynan keıin.
Onyń paıymynsha, ulttyq valıýta baǵamynyń nyǵaıýyna Taıaý Shyǵystaǵy shıelenistiń báseńdeýine baılanysty munaı baǵasynyń tómendeýi de áser etken.
— AQSh pen Iran arasyndaǵy aldyn ala kelisimniń nátıjesinde munaı baǵasy kúrt tómendedi. Buǵan deıin bir barreli shamamen 100 dollar bolsa, qazir tańerteńgi málimet boıynsha 78 dollar deńgeıinde sııaqty. Soǵan qaramastan, bul da teńge baǵamyna aıtarlyqtaı áser ete alǵan joq, - dedi Ulttyq bank basshysy.
Ol qazirgi ýaqytta teńge birqatar sebepke baılanysty nyǵaıa túskenin atap ótti.
— Sarapshylar da, naryq ta, jalpy oıynshylar makroekonomıkalyq turaqtylyqty, ınflıatsııamen kúreske baǵyttalǵan saıasatty jáne sapaly ári ınklıýzıvti ekonomıkalyq ósimge umtylysty kórip otyr. Sondyqtan osy faktorlardyń aıasynda teńge ózin jetkilikti túrde berik ustap keledi, — dep túıindedi ol.
Aıta keteıik, Ulttyq bank tsıfrlyq teńge aınalymyn 1 trln teńgege jetkizýdi josparlap otyr.
