Tımýr Súleımenov sógis alǵan mınıstrlik ókilderine qatysty túsinik berdi

ASTANA. QazAqparat - Ulttyq ekonomıka mınıstri Tımýr Súleımenov vıtse-mınıstr Serik Jumanǵarın men monopolııaǵa qarsy komıtet basshysy Azamat Maıtıevke sógis jarııalanýyna qatysty pikir bildirdi, dep habarlaıdy QazAqparat.

«Osyndaı sheshimderdi memlekettik qyzmetshiler aýyr qabyldaıdy. Árıne, olar jumystaryn jalǵastyrady, sebebi olar óz salasynyń bilikti mamandary. Degenmen de olardyń tarapynan oryndalmaı qalǵan keıbir jaǵdaılar bar. Sógis jarııalaýdan keıin onyń saldary bolady, ıaǵnı atalǵan qyzmetshiler barlyq syılyqaqylardan qaǵylady. Al bul syılyqaqylar negizinen jyldyń sońynda qomaqty deńgeıde esepteledi», - dedi T. Súleımenov Úkimet otyrysynan keıin tilshilerge bergen jaýabynda.

Osy oraıda ol jarııalanǵan sógis sany ekeýge jetse, onda memqyzmetshi jumysynan bosatylatynyn atap ótti.

«Olarda jaǵdaıdy túzetýge barlyq múmkindik bar. Eger de sheneýnik qatelikterin túzetse, onda atalǵan sógistiń kúshin joıýǵa bolady. Bul máselede qazirgi kezde olarǵa qarjylyq turǵydan da aıtarlyqtaı qıyn bolady», - dedi mınıstr.

Budan buryn habarlanǵandaı, jaqynda  Elbasy tarıf salasynda oryn alǵan kemshilikterge baılanysty QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń tóraǵasy Azamat Maıtıevke sógis jarııalady.

Al búgin ótken Úkimet otyrysynda  Ulttyq ekonomıka vıtse-mınıstri Serik Jumanǵarın sógis alǵandyǵy belgili boldy.