Tımýr Súleımenov nesıe alýǵa jubaıynyń kelisimin mindetteý normasy týraly pikir bildirdi

ASTANA. KAZINFORM – Ulttyq bank tóraǵasy Tımýr Súleımenov bazalyq mólsherlemege arnalǵan kezekti brıfıngide nesıe rásimdeýde jubaıynyń kelisimin mindetteý normasy týraly pikir bildirdi.

«Kredıt alý úshin jubaıynyń kelisimin mindetteý týraly normanyń taǵdyry ne bolyp jatyr? Bul norma úıdegi zorlyq-zombylyqty arttyra túsedi deıtin paıymdar bar. Onyń ústine Memlekettik kirister komıtetiniń málimeti boıynsha, 800 qazaqstandyqtyń ekiden kóp nekesi bar kórinedi. Bul másele qalaı retteledi?» - dep surady jýrnalıst.

Ulttyq bank basshysy somasy úlken nesıeni jubaıynyń kelisimi arqyly ǵana berý oryndy dep esepteıtinin aıtty.

«Meniń kózqarasym boıynsha, kez kelgen normany aqylmen qoldaný kerek. Meniń túsinýimshe, Qarjy naryǵyn retteý jáne damytý agenttigi jubaıynyń kelisimin qajet etetin soma belgileýdi oılastyryp jatyr. ıAǵnı, bireý aılyq túskenshe dep 50 myń teńge borysh alǵysy kelse, jubaıynyń ruqsaty kerek bolmaıdy. Al 10 mln teńge alǵysy kelse, sózsiz jubaıynyń kelisimi kerek. Óıtkeni ondaı boryshtyń aýyrtpalyǵyn erteń ekeýi de arqalaıdy. Sondyqtan asyra siltep jibermeıtindeı teńgerimdi meje kerek. Eger durys teńgerim bolsa, jalpy bul norma durys dep oılaımyn. Óıtkeni óziniń ǵana emes, búkil otbasynyń ál-aýqatyn táýekelge tigý degen durys emes. Otbasy bolǵannan keıin sheshim de birge qabyldanýy qajet», - dedi Tımýr Súleımenov.