Tımýr Súleımenov monopolııaǵa qarsy komıtet jumysyn kúsheıtýdi tapsyrdy
ASTANA. QazAqparat - Tımýr Súleımenov Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń jumysyn kúsheıtý jóninde birqatar tapsyrmalar berdi, dep habarlaıdy QazAqparat QR UEM baspasóz qyzmetine silteme jasap.
Qazaqstan Respýblıkasynyń Prezıdenti N.Á.Nazarbaevtyń tóraǵalyǵymen aǵymdaǵy jylǵy 7 qarashada Aqordada ótkizilgen Qaýipsizdik keńesiniń TKSh salasyndaǵy tarıf túzilýine arnalǵan otyrysynyń qorytyndysy boıynsha Qazaqstan Respýblıkasynyń Ulttyq ekonomıka mınıstri Tımýr Súleımenov Mınıstrliktiń jáne Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń basshylyǵymen jumys májilisin ótkizdi.
Mınıstr Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetine naqty merzim ishinde, onyń ishinde zańnama normalaryn túzetýdi kózdeıtin jedel is-qımyl josparyn ázirleýdi tapsyrdy.
Sondaı-aq, Komıtetke jumys tásilin ózgertý boıynsha naqty usynystar ázirleý jáne aýmaqtyq departamenttermen ózara is-qımyldy baqylaýdy kúsheıtýdi mindettedi.
Májilis qorytyndysynda, Tımýr Súleımenov tarıf belgileýdi retteý, baqylaý jáne qadaǵalaý júıesi boıynsha júrgizilgen jumystardyń sapasyn arttyrýdyń, TKSh salasyndaǵy tabıǵı monopolııalar sýbektileriniń qyzmetin taldaýdy júrgizýdiń qajettigin atap kórsetti.
