Tımýr Súleımenov memlekettik qyzmetke qalaı kelgenin aıtyp berdi

ASTANA. QazAqparat - «Bolashaq» halyqaralyq stıpendııasynyń túlegi, qazirgi Ulttyq ekonomıka mınıstri Tımýr Súleımenov sheteldegi oqýy jáne memlekettik qyzmetke qalaı kelgendigi týraly aıtyp berdi, dep habarlaıdy QazAqparat tilshisi.

«Oqýdy 2000 jyly bastadym, 2002 jyly magıstratýrany aıaqtadym. «Bolashaq» baǵdarlamasymen AQSh-tan, Anglııadan kelip, jumys istep jatqandar kóp boldy. Biraq, eki myńynshy jyldardyń basyndaǵy Qazaqstan, sol jyldardaǵy AQSh-qa da, Anglııaǵa da uqsamaıdy. Álbette, mádenı sıpattary, korporatıvtik tıimdilik turǵysynan da mınıstrlikter men óńir bılikteriniń, ulttyq kompanııalardyń shet memleketterge qaraǵanda aıyrmashylyǵy óte kóp edi. Meniń bul rette jolym boldy dese de bolady. Sebebi, men Batystan oqyp kelip, birden batystyq kompanııaǵa jumysqa turdym», - dedi Tımýr Súleımenov Astanada «Bolashaq» halyqaralyq stıpendııasynyń 25 jyldyǵyna arnalǵan forýmda.

Mınıstr óz sózinde keıin ulttyq kompanııaǵa, odan soń memlekettik qyzmetke aýysqanyn eske aldy.

«AQSh-taǵy men oqyǵan Merılend ýnıversıtetinde maǵan deıin de, menen keıin de oqyǵan qazaqstandyqtar bolmady. Nelikten olaı bolǵanyn túsindirip bere almaımyn. Osynda otyrǵan adamdardyń báriniń ómirinde «Bolashaq» baǵdarlamasy tereń iz qaldyrǵany anyq. Braýn myrza (Ato Braýn - Dúnıejúzilik banktiń Qazaqstandaǵy ókili) jańa óz sózinde «nation building» sózin qoldanyp qaldy. Biz ony «memleket qurý» dep aýdaramyz. Biraq, mundaǵy «nation» sózi - ultqa da qatysty qoldanyla alady. Álbette, qazaq retinde bizdiń tarıhymyz tereńde. Biraq, zamanǵa saı memleket, zamanǵa saı ult retinde biz áli de qalyptasyp kele jatyrmyz», - deıdi Tımýr Súleımenov.

Mınıstr memleketti qurýda da, ulttyń birliginde de «Bolashaq» baǵdarlamasynyń mańyzy erekshe ekenin atap ótti.

«Biz kórshiles birqatar memleketpen bir starttan jol bastaǵan elmiz. Biraq, kóp baǵytta alǵa shyqqanymyz aıqyn. Osyǵan eń aldymen, Prezıdenttiń kóshbasshylyǵy, ekinshiden, osy baǵdarlama negiz bolǵanyn aıtqym keledi», - dedi ol.

Eske sala ketsek, Astanada «Bolashaq» halyqaralyq stıpendııasynyń 25 jyldyǵyna oraı «Adamı kapıtal - jańǵyrý negizi» atty forým ótti. Onyń  barysynda QR Memlekettik hatshysy Gúlshara Ábdiqalyqova Prezıdent Nursultan Nazarbaevtyń stıpendıanttarǵa joldaǵan quttyqtaý hatyn oqyp berdi. Elbasynyń atap ótýinshe, «Bolashaq» halyqaralyq stıpendııasy dúnıejúzine tanylǵan qazaqstandyq brendke aınaldy.