Tımýr Súleımenov qazaqstandyq sarapshylarmen kezdesti

ASTANA. QazAqparat - Búgin elimizdiń Ulttyq ekonomıka mınıstri Tımýr Súleımenov jaqyn arada ótetin Astana ekonomıkalyq forýmyna oraı qazaqstandyq sarapshylarmen kezdesti, dep habarlaıdy QazAqparat tilshisi.

Shara barysynda forýmnyń Ortalyq Azııa elderine qatysty sessııasyn júrgizetin «Qoǵamdyq problemalardy saraptaý ortalyǵy» qoǵamdyq qorynyń dırektory Merýert Mahmutova  taqyrypqa qatysty oılarymen bólisti.

«Ózbekstan basshylyǵy aýysqannan keıin jańa Prezıdent kórshi eldermen yntymaqtastyqty  jolǵa qoıýdy qolǵa aldy. Ol syrtqy álemge barynsha ashyq ekendigin kórsetti.  Ol jaqta reformalardyń qandaı jyldam qarqynmen júrip jatqanyn kórip otyrmyz. Ortalyq Azııanyń eki iri ekonomıkasynyń ózara tıimdi yntymaqtastyǵy bizge paıda ákelerine úmittenemin», - dedi ol.

 Osy rette, qor basshysy Ortalyq Azııanyń 5 eliniń ishki jalpy óniminiń 75 paıyzyn Qazaqstan qamtamasyz etip otyrǵandyǵyn aıtty.

«Degenmen, Ózbekstannyń óńirdegi halqy eń kóp el ekendigin esten shyǵarmaǵan jón. Syrtqy álemmen qarym-qatynasty kórshilermen birlese otyryp qalyptastyrý qajet. Biz negizgi geosaıası orynda turmyz. Menińshe, egerde biz óńir retinde jumylsaq, yqpalymyzdyń kúsheıe túsetindigi sózsiz. Búginde Japonııa, Qytaı, AQSh-tyń Ortalyq Azııaǵa qyzyǵýshylyǵy bar. Osy rette biz syrtyq álemmen baılanysta bir tarap bola alsaq, bul Qazaqstannyń, jalpy Ortalyq Azııanyń ustanymyn kúsheıte túsedi», - dedi Merýert Mahmutova.

Al AEF-tiń bas prodıýseri Býlat Stolıarov 11-shi forýmda jahandyq 11 syn-qater halyqaralyq sarapshylardyń talqysyna túsetindigin basa aıtty.