Tımýr Súleımenov: Qatań aqsha-kredıt saıasaty – maqsat emes, ınflıatsııany tejeý quraly

ASTANA. KAZINFORM  - Joǵary mólsherleme men qatań aqsha-kredıt saıasaty – maqsat  emes, ınflıatsııany tejeý quraly.  Bul týraly Ulttyq bank tóraǵasy Tımýr  Súleımenov aıtty.

- Qazir ekonomıkanyń ósý qarqyny joǵary ekeni anyq. Alaıda ol halyq tabysynyń ósýine tolyq áserin kórsetken joq. Negizgi tejeýshi faktor – ınflıatsııa. ıAǵnı nomınaldy tabys ósip jatqanymen, ınflıatsııa onyń oń áserin teńestirip otyr. Sol sebepti Ulttyq bank bazalyq mólsherlemeni ınflıatsııany tómendetýdi qamtamasyz etetin deńgeıde ustap otyr. Bizdiń maqsatymyz – baǵanyń tómen jáne turaqty ósýin qamtamasyz etý, azamattardyń jalaqysy men jınaqtarynyń qunyn saqtaý, - dedi UB tóraǵasy.

Onyń paıymynsha, joǵary ınflıatsııa eń kóp zııan keltiretin faktor sanalady. Ol, ásirese áleýmettik qorǵalmaǵan toptarǵa aýyr tıedi.

- Bul jaǵdaıda joǵary mólsherleme men qatań aqsha-kredıt saıasaty – maqsat emes, ınflıatsııany tejeý quraly. ıAǵnı halyqtyń ál-aýqatyn arttyrý quraly sanalady. Ekonomıka turǵysynan turaqty tómen ınflıatsııalyq orta – qolaıly ınvestıtsııalyq klımat pen kásipkerlik ortany qamtamasyz etetin negizgi elementterdiń biri. Úkimetpen, agenttikpen jáne basqa da memlekettik organdarmen úılestirilgen kúsh-jigerimizdiń arqasynda biz baǵa turaqtylyǵyn qamtamasyz etip, ortamerzimdi perspektıvada belgilengen nysanaly deńgeıge qol jetkize alamyz dep senemiz, - dedi Tımýr Súleımenov.

Buǵan deıin Ulttyq bank bazalyq mólsherlemeni taǵy da 16,5 paıyz deńgeıinde qaldyrǵanyn jazǵan edik.