Tımýr Súleımenov: Іshki suranys pen eksportty úılestirý kerek
«Bizdiń ekonomkıalyq saıasattyń negizgi basymdyǵy – ekonomıkanyń dıversıfıkatsııasy, básekege qabiletti óńdeý ónerkásibin damytý, taýarlar men qyzmetterdiń eksportyn alǵa jyljytý. Atalmysh sıpattaǵy jumystar keshendi amal-ádisterdi, memleket pen otandyq bıznestiń ózara árekettese jumys júrgizýin talap etedi. Mınıstrlik jańa óndiristiń tolyqqandy tizbegin qamtamasyz etetin naqty strategııany ázirleýi kerek. Іshki naryqtyń qajettigi men eksporttyń arasyndaǵy úılesimdi saqtaýy tıis. Ózimizge qajetti taýarlar men qyzmetterdiń eksportqa ketip qalýyna jol bermeýimiz kerek», - dedi Tımýr Súleımenov elordada ótip jatqan Saýda jáne ıntegratsııa mınıstrliginiń keńeıtilgen otyrysynda.
QR Prezıdenti Ákimshiligi basshysynyń orynbasarynyń aıtýyna qaraǵanda, joǵaryda atalǵan másele boıynsha 2025 jylǵa deıingi saýda saıasatyn damytý memlekettik baǵdarlamasyn ázirleý mindeti júktelip otyr.
«Qazaqstannyń eksporttyq áleýetin arttyrý úshin bizdiń ónimderdiń sapasy men olardyń álemdik naryqtaǵy básekege qabilettigin arttyrý isin turaqty túrde júrgizip otyrý kerek. Búgingi tańda biz álemniń 130 eline qazaqstandyq ónimniń 800 túrin eksporttaımyz. Dese de, bul baǵytta memlekettik qoldaýda min joq dep áste aıta almaımyz. Sol sebepti mınıstrlik bul baǵyttaǵy jumysty ary qaraı jetildirýi kerek. Sonymen qatar, Úkimetke tehnıkalyq retteý boıynsha jańa zań ázirleý mindeti júkteldi. Tehnıkalyq retteý quraldary bizdiń tutynýshylardy sapaly ári qaýipsiz ónimmen qamtamasyz etýge jumsalýy tıis», - dedi ol.
Eske sala ketsek, Úkimettiń keńeıtilgen otyrysynda Memleket basshysy Qasym-Jomart Toqaev 2025 jylǵa deıingi saýda saıasaty jónindegi memlekettik baǵdarlama ázirleýdi tapsyrǵan bolatyn.
