Tımýr Súleımenov ınflıatsııalyq qysymnyń tómendeýine áser etken faktorlardy atady
ASTANA. KAZINFORM — Ulttyq bank tóraǵasy Tımýr Súleımenov ınflıatsııalyq qysymnyń tómendeýine áser etken faktorlardy tizip berdi.
— Ulttyq banktiń Aqsha-kredıt saıasaty komıteti bazalyq mólsherlemeni 18 paıyz deńgeıinde saqtaý týraly sheshim qabyldady. Bul jolǵy sheshim de boljamdyq raýnd nátıjelerine negizdelip otyr. Komıtet naqty derekter men táýekelder balansyn eskerip, qazirgi makroekonomıkalyq jaǵdaıǵa keshendi taldaý júrgizdi. Jyldyq ınflıatsııa aqpan aıynda baıaýlap, 11,7 paıyz boldy, — dedi ol BAQ ókilderine arnalǵan brıfıngte.
Onyń aıtýynsha, ınflıatsııalyq qysymdy tómendetýge ustamdy qatań aqsha-kredıt sharttary, ınflıatsııaǵa qarsy sharalardy iske asyrý, kepilsiz tutynýshylyq kredıtterdiń ósý qarqyny baıaýlaǵany, sondaı-aq eń tómengi rezerv talaptaryn arttyrý jáne altyn operatsııalaryn «aınalaý» arqyly artyq ótimdilikti alý syndy faktorlar yqpal etti.
— Qosymsha tejeýshi áserdi turǵyn úı-kommýnaldyq qyzmeti men janar-jaǵarmaı baǵasyn kóterýge jarııalanǵan moratorıı, sondaı-aq teńge baǵamynyń qolaıly dınamıkasy qalyptastyryp otyr. QQS-tyń kóterilý áseri ótken jyly baǵaǵa edáýir «sińip» ketkendikten, qazirgi kezde onyń yqpaly shekteýli dep baǵalanady. Sonymen birge ınflıatsııalyq qysym saqtalyp otyr. Buǵan ınflıatsııalyq kútýlerdiń joǵary bolýy, salyq ózgeristeriniń, kommýnaldyq tarıfterdiń jáne janar-jaǵarmaı baǵasynyń yqtımal janama áseri yqpal etedi, — dedi Tımýr Súleımenov.
Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
