Tımýr Súleımenov halyqaralyq uıymdardan tıimdi qarajat tartýdyń jolyn usyndy
ASTANA. QazAqparat - Bank júıesi óziniń ekonomıkanyń qozǵaýshy tetigi retindegi negizgi qyzmetin atqaryp jatqan joq. Bul týraly QR Ulttyq ekonomıka mınıstri Tımýr Súleımenov «Atameken» ulttyq kásipkerler palatasynyń IV Sezinde málimdedi, dep habarlaıdy «QazAqparat» HAA tilshisi.
«Elimizde ekonomıkany kredıtteý máselesi ótkir kúıinde qalyp keledi. Bizde JІÓ-ge shaqqandaǵy kredıtteý shamamen 45%-dy quraıdy. Damyǵan elderde bul kórsetkish 100%-dy quraıdy. Osylaısha, bank júıesi ekonomıkanyń qozǵaýshy kúshi retindegi óziniń negizgi qyzmetin tolyq oryndap jatqan joq. Bul atalǵan máseleni túbegeıli sheshpeıinshe, tutas ekonomıkanyń jandanýyn kútý bekershilik», - dedi T. Súleımenov.
Sondaı-aq mınıstr mıkrokredıttik uıymdardyń qarajattary boıynsha kredıt berý máselesine toqtaldy.
«Bul baǵytta ulttyq kásipkerler palatasy men mıkrokredıttik uıymdar naqty qadamdar jasap úlgerdi. Biz de óz kezegimizde «Báıterek» holdıngimen jáne «Damý» qorymen birlesip apekstik qor qurýdy usynýdamyz. ıAǵnı, atalǵan qor arqyly ekonomıkanyń naqty baǵyttaryna jáne mıkrokredıttik uıymdar úshin barynsha jeńildikter qarastyratyn halyqaralyq qarjy uıymdarynyń qarajatyn tartý kózdelýde», - dep óz sózin túıindedi Ekonomıka mınıstri.
