Tımýr Súleımenov BJZQ-nyń tabysyna qatysty túsinik berdi
ASTANA. KAZINFORM — BJZQ zeınetaqy qarajatyn qanshalyqty tıimdi basqaryp otyr. Bul suraqqa elordada ótken baspasóz máslıhatynda Ulttyq bank tóraǵasy Tımýr Súleımenov jaýap berdi.
- Biryńǵaı jınaqtaýshy zeınetaqy qory (BJZQ) shamamen 3,2% kiristilik kórsetip otyr. Bul kórsetkish joǵaryraq bolýy múmkin be edi? Iá, múmkin edi, óıtkeni keıbir jeke basqarýshy kompanııalar budan joǵary nátıjege qol jetkizdi. Degenmen, BJZQ oń kiristilikti qamtamasyz etip otyr. Biz bul týraly birneshe ret aıtqanbyz, ıaǵnı 27 trln teńgelik qomaqty portfeldi qajetti ıkemdilikpen ári jyldamdyqpen basqarý ońaı emes. Atap aıtqanda, 15-20 mlrd teńgelik portfeldi basqarýǵa qaraǵanda, áldeqaıda kúrdelirek mindet, - dedi T. Súleımenov.
Onyń aıtýynsha, zeınetaqy qory basqarýshysynyń basty mindeti – naryqtyq, eldik jáne valıýtalyq táýekelderden qorǵaıtyn baıypty ári konservatıvti portfeldik bólýdi qamtamasyz etý.
- Menińshe, Ulttyq bank pen Biryńǵaı jınaqtaýshy zeınetaqy qory bul mindetti tabysty oryndap keledi... Degenmen, aktıvterdi anaǵurlym belsendi basqaratyn jeke kompanııalar da bar. Olar ıkemdi ári beıimdelgish keledi, portfelderi shaǵynyraq bolady jáne joǵaryraq kiristilik usynady. Eń bastysy, zań shyǵarýshy organmen birlese otyryp, biz adamdarǵa tańdaý múmkindigin berdik. Sondyqtan jeke kompanııalardy tańdasańyzdar, onda ınvestıtsııa salyp kórińizder. Eger unamasa, qarajattaryńyzdy BJZQ-da qaldyra berińizder. Biz eshkimdi májbúrlemeýimiz kerek – bul árqaısymyzdyń jeke tańdaýymyz, - dedi UB basshysy.
Buǵan deıin habarlanǵandaı, QR Ulttyq bankiniń Aqsha-kredıt saıasaty komıteti bazalyq mólsherlemeni jyldyq 15,75% deńgeıinde belgileý týraly sheshim qabyldady.
