Tımýr Súleımenov: BJZQ-dan qarajat alý sheginiń tásilderin qatańdatý qajet

ASTANA. KAZINFORM — Prezıdent Qasym-Jomart Toqaev Úkimettiń keńeıtilgen otyrysynda mal sharýashylyǵyn sýbsıdııalaýdyń kóleńkeli tustary tolyq seıilmegenin synady.

— Zeınetaqy aktıvteri 12% ósip, 25,1 trln teńgege jetti. Biryńǵaı jınaqtaýshy zeınetaqy qorynyń ınvestıtsııalyq kirisi 1,8 trln teńge boldy. Uzaq merzimdi kiristilikti arttyrý úshin aktsııalar men balama quraldardyń joǵary kiristi klastaryn arttyrýdy josparlap otyrmyz. Sonymen qatar zeınetaqy tólemderiniń laıyqty deńgeıi úshin almastyrý koeffıtsıentin (qazir alyp júrgen eńbekaqy men keıin alatyn zeınetaqynyń bir-birine jaqyndyǵyn — red) kóterý qajet. Bul merziminen buryn qarajat alý sheginiń tásilderin qatańdatýdy talap etedi, — dedi Ulttyq bank basshysy. 

Tımýr Súleımenov bıyl Ulttyq qordyń ınvestıtsııalyq tabystylyǵy rekordtyq mánge jetkenin aıtady.

— Ulttyq qor, odan qomaqty transfertter alynǵanyna qaramastan, ótken jyly ulǵaıa tústi. Aktıvterdiń teńgerimdi allokatsııasyna (qarajatty ártúrli aktıv túrlerine belgili bir tepe-teńdikpen bólý — red.) der kezinde kóshýi 8,7 mlrd dollar nemese 15% rekordtyq tabys ákeldi. «Ulttyq qor — balalarǵa» baǵdarlamasy aıasynda bir balaǵa shaqqandaǵy jınaq 370 dollarǵa jetti. Bıyl Ashyq ınvestıtsııalyq seriktestik baǵdarlamasyn iske qosamyz. 1 mlrd dollarǵa deıin joǵary tehnologııalyq jobalarǵa ınvestıtsııalaýdy josparlap otyrmyz, — dedi ol.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.