Tımýr Súleımenov bıylǵy ınflıatsııa boljamyn jarııa etti

— Ótken jyly negizgi ekonomıkalyq syn-qater ınflıatsııa boldy. Ulttyq bank Úkimetpen birge ınflıatsııalyq úrdisti ózgertip, baǵanyń ósýin baıaýlatýǵa qol jetkizdi. Ulttyq bank ınflıatsııany tómendetý úshin aqsha-kredıt saıasatynyń sharalaryn, makroprýdentsııalyq quraldardy jáne basqa sharalar keshenin qoldandy. Monetarlyq sharalardyń yqpalyn kúsheıtý úshin mınımaldy talaptar tetigin jetildirip, altyn satyp alý operatsııalaryn teńestirýdi engizdi. Úılestirilgen is-áreketterdiń nátıjesinde ınflıatsııa ótken jylǵy qyrkúıektegi 13 paıyzǵa jýyq kórsetkishten bıyl mamyrda 10,4 paıyzǵa deıin baıaýlady. Bıyl biz ınflıatsııany 9-11 paıyz aralyǵynda boljap otyrmyz. Osyǵan baılanysty biz 5 maýsymda bazalyq mólsherlemeni 18-den 17 paıyzǵa deıin tómendettik, — dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.

Degenmen, ol ınflıatsııa áli de eki tańbaly bolǵandyqtan ınflıatsııalyq jaǵdaı tolyq turaqtandy dep aıtýǵa áli erte ekendigin basa aıtty.

— Negizgi táýekelder — geosaıası turaqsyzdyq pen azyq-túliktiń álemdik baǵasynyń ósýi. Іshki táýekel faktorlary — turǵyn-úı kommýnaldyq qyzmetter tarıfteri men janar-jaǵarmaı reformasynyń qaıta bastalýy jáne monetarlyq bazanyń ósýi. Inflıatsııany turaqtandyrýdyń mańyzdy faktory — fıskaldyq konsolıdatsııa. Ulttyq qordan bólinetin transfertterdi 2,8 trln teńgege deıin shekteý — mańyzdy dezınflıatsııalyq faktor. Endi respýblıkalyq bıýdjettiń konsolıdatsııasyn is júzinde iske asyrǵan jón, — dedi Ulttyq bank basshysy.

Aıta keteıik, 2025 jyly elimizdiń altyn-valıýta rezervteri 42,8 paıyzǵa ósti.