Tımýr Súleımenov bıylǵy ınflıatsııa boljamyn jarııa etti
ASTANA. KAZINFORM – Ulttyq bank tóraǵasy Tımýr Súleımenov bıylǵy ınflıatsııa boljamyn jarııa etti.
- Osy jylǵa arnalǵan ınflıatsııa boljamy naqtylandy. 2025 jyly ınflıatsııa 11-12,5 paıyz aralyǵynda bolady dep boljanyp otyr. Kelesi jyldarǵa arnalǵan boljam ózgergen joq: 2026 jyly baǵa ósimi - 9,5–11,5 paıyz, al 2027 jyly ınflıatsııa 5,5–7,5 paıyz deńgeıine deıin tómendeıdi, - dedi Ulttyq bank tóraǵasy.
Onyń aıtýynsha, ınflıatsııa boljamynyń táýekelderi ishki suranys tarapynan qysymnyń kúsheıýine, ınflıatsııalyq kútýlerdiń turaqsyzdyǵyna, syrtqy ınflıatsııanyń jedeldeýine baılanysty. Sonymen qatar belgisizdik faktory retinde retteletin baǵalar, onyń ishinde janar-jaǵarmaıdy reformalaý qarqyny men merzimi, ınflıatsııalyq kútýler men ınflıatsııanyń turaqty bóligine tıgizetin janama áseri qarastyrylyp otyr.
- 2025 jylǵa jalpy ishki ónimniń ósý boljamy qalyptasqan ınvestıtsııalyq belsendiliktiń joǵary qarqynyna jáne turaqty tutynýshylyq suranysqa baılanysty 5,5-6,5 paıyz aralyǵynda joǵarylaý jaǵyna qaıta qaraldy. Keıingi jyldardyń boljamdary ózgeriske ushyramady. 2026 jylǵa – 4-5 paıyz. 2027 jyly ekonomıkanyń ósý qarqyny teńgerimdi deńgeıge jaqyndaıdy dep kútemiz. Jalpy ishki ónim boljamynyń táýekelderi Ulttyq qordan qarajat alýdy tómendetý josparyn iske asyrýmen qatar fıskaldyq tártipti saqtaýǵa, ishki suranystyń kúsheıýine jáne basty eksporttyq pozıtsııalar baǵasynyń tómendeýine baılanysty, - dedi Tımýr Súleımenov.
Buǵan deıin Ulttyq bank bazalyq mólsherlemeni kóterýi múmkin ekenin jazǵan edik.