Tımýr Súleımenov: Bazalyq mólsherlemeni kez kelgen ýaqytta ózgertýimiz múmkin

ASTANA. KAZINFORM –  Álem ekonomıkasyndaǵy jaǵdaı men Qazaqstannyń óz ishindegi ahýal kúrt ózgerse búgin qabyldanǵan bazalyq mólsherleme kenet ózgerýi múmkin. Bul týraly Ulttyq bank tóraǵasy Tımýr Súleımenov aıtty.

- Álem ekonomıkasyndaǵy konıýnktýra kúrt ózgerse syrtqy jáne ishki syn-qaterler iske asqan jaǵdaıda Ulttyq banktiń aqsha-kredıt saıasat jónindegi komıteti bazalyq mólsherleme boıynsha kezekten tys sheshim qabyldaýǵa haqyly. Bul komıtet álem naryǵyndaǵy ahýaldy muqııat baǵyp, onyń bizdegi ınflıatsııa protsesterine yqpalyn baǵalap otyrady, - dedi Tımýr Súleımenov.

Sondaı-aq álem ekonomıkasyndaǵy qazirgi jaǵdaı teńgemen saqtalǵan depozıtterdiń kólemine qalaı áser etetini týraly pikir bildirdi.

- Byltyr qarasha aıynyń aıaǵy men jeltoqsan aıynda teńgege qysym kóp boldy. Keıbir sarapshylar osy kezde teńgemen saqtaýly depozıt ıeleri dollarǵa kóshedi degen qaýipterin aıtyp jatty. Birinshi toqsannyń statıstıkasyn kórip otyrmyz. Adamdardyń teńgege degen senimi sol kúıinde. Onyń ústine teńgemen saqtalatyn depozıtterdiń paıyzdyq mólsherlemesi de aqylǵa qonymdy – ınflıatsııanyń keri áserin jaýyp ketip jatyr. Bul azamattarǵa aqshasyn qunsyzdanýdan saqtaýǵa kómektesip otyr. Sondyqtan da depozıtterdiń dollarsyzdaný deńgeıi 22,5% deńgeıinde. Bul tarıhı kórsetkishterdiń eń tómengi shegine jaqyn. Sondyqtan qazaqstandyqtar ulttyq valıýtaǵa senim artatynyn sandardyń ózi kórsetip tur. Adamdar aqshasyn teńgemen saqtap otyr, - dedi Tımýr Súleımenov.

Aıta keteıik, búgin Ulttyq bank bazalyq mólsherleme týraly jańa sheshim qabyldady.