Tımýr Súleımenov bazalyq mólsherleme deńgeıin saqtaý sebebin túsindirdi
ASTANA. KAZINFORM – Ulttyq bank tóraǵasy Tımýr Súleımenov bazalyq mólsherleme deńgeıin saqtaý sebebin túsindirdi.
- Ulttyq banktiń Aqsha-kredıt saıasaty komıteti bazalyq mólsherlemeni 16,5 paıyz deńgeıinde saqtaý týraly sheshim qabyldady. Sheshim ekonomıkalyq ósim men ınflıatsııanyń jańartylǵan boljamdary, sondaı-aq syrtqy jáne ishki jaǵdaılar men táýekelder balansy eskerile otyryp qabyldandy. Ekonomıkadaǵy ınflıatsııalyq qysym, eń aldymen, qyzmetter men azyq-túlik salasynda kúsheıip keledi. Inflıatsııalyq kútýler de joǵarylady. Suranys usynystan artyp otyr. Tutynýshylyq nesıeleýdiń áli de joǵary bolýy ınflıatsııany qosymsha kúsheıtýde, - dedi UB tóraǵasy.
Tımýr Súleımenov syrtqy ekonomıkalyq konıýnktýra qubylmaly bolyp turǵanyn aıtty.
- Álemdik azyq-túlik baǵasy ósip, munaı baǵasy tómendedi. Al, Reseıde joǵary ınflıatsııa saqtalyp otyr. Osyndaı jaǵdaıda táýekelder balansy proınflıatsııalyq jaqta qaldy. Inflıatsııalyq kútýlerdi tómendetip, ınflıatsııany turaqty túrde báseńdetý úshin aqsha-kredıt saıasatynyń qazirgi qatań deńgeıin uzaǵyraq saqtaý qajet bolyp otyr. Dezınflıatsııalyq úderiste paıyzdyq saıasatpen qatar qosymsha sharalar da mańyzdy ról atqarady, - dedi ol.
Buǵan deıin Tımýr Súleımenov krıptovalıýtaǵa ınvestıtsııa salýǵa qatysty pikir bildirgen edi.