Bazalyq mólsherleme 16,5% bolyp turǵanda ıpoteka alý qajet emes - Tımýr Súleımenov

ASTANA. KAZINFORM –  Ulttyq bank tóraǵasy Tımýr Súleımenov ıpoteka rásimdeýdi josparlap júrgen qazaqstandyqtarǵa keńes berdi.

- Biz qazir aıtarlyqtaı qatań aqsha-nesıe mólsherlemesin májbúrli túrde ustap otyrmyz. Bazalyq mólsherleme 16,5 paıyz bolǵan kezde ıpotekanyń paıyzdyq mólsherlemesi 20 paıyz jáne odan da joǵary bolatyny túsinikti. Mundaı mólsherlememen naryqtyq ıpoteka rásimdeý degen, menińshe, úlken táýekel, - dedi Ulttyq bank basshysy.

Onyń paıymdaýynsha, bazalyq mólsherleme túskenshe memlekettik damý ınstıtýttarynyń ıpoteka baǵdarlamalaryna arqa súıeý kerek.

- Naryqtaǵy ıpotekanyń mólsherlemesi 20 paıyzdan bastalǵanymen qosa 15-20 jylǵa beriletinin eskersek, artyq tóleıtin soma da orasan bolady. Meniń paıymdaýymsha, bul jeke qarjylyq jaǵdaıyńyzdy da turaqsyzdandyrýy múmkin. Keıbir bankter naryqta ıpoteka berýmen belsendi aınalysyp ketse, ózderiniń de qarjylyq turaqtylyǵyna áserin tıgizýi múmkin. Bizdiń básekelestikti qoldaıtynymyz sózsiz. Biraq ahýalǵa shynaıy qarap, adal sóıleýimiz kerek. Qazirgi bazalyq mólsherleme turǵanda naryqtyq ıpoteka kótere almaıtyn shoqpardy belge baılaý deýge bolady. «Naýryz», «Otbasy bank» sııaqty memlekettik ıpotekalardy paıdalanǵan durys, - dedi Tımýr Súleımenov.

Aıta keteıik, búgin Ulttyq bank bazalyq mólsherleme týraly jańa sheshim qabyldady.