Tımýr Súleımenov aldaǵy 3 jyldyq ınflıatsııaǵa boljam jasady
ASTANA. KAZINFORM – Bıyl ınflıatsııa 7,5-9,5 paıyz sheginde bolady. Bul týraly Ulttyq bank tóraǵasy Tımýr Súleımenov aıtty.
«Bıylǵa ınflıatsııa boljamy ózgergen joq. Baǵa 7,5-9,5 paıyz sheginde ósedi dep kútilýde. 2025 jylǵa arnalǵan boljam 5,5-7,5 paıyz deńgeıinde saqtaldy. 2026 jyly bizdiń baǵalaýymyz boıynsha ınflıatsııa targetke jaqyndap, 5-6 paıyz sheginde qalyptasady. Osy jyldyń aqpan aıynda ótken jylǵy joǵary baza tolyq shyqqanyna jáne ekonomıka ishinde baǵa qysymy faktorlarynyń bolýyna baılanysty ınflıatsııanyń tómendeý qarqyny baıaýlaıdy. Aqsha-kredıt sharttarynyń ustamdy qatań sıpaty jáne syrtqy ortadaǵy baǵa ósý jaǵdaıynyń odan ári jaqsarýy ınflıatsııanyń tómendeýine yqpal etedi. Boljamda kórinis tapqan negizgi táýekelder: bıýdjet saıasaty parametrleriniń jetkiliksiz anyqtyǵy, aǵymdaǵy fıskaldyq yntalandyrý, turaqsyz ınflıatsııalyq kútýlerge negizdelgen ınflıatsııanyń ornyqtylyǵy, sondaı-aq Qazaqstannyń negizgi saýda-seriktesterine qatysty sanktsııalyq qysymnyń yqtımal ósýi», - dedi ol Ulttyq bankte ótken brıfıngte.
Onyń atap ótýinshe, Qazaqstan ekonomıkasynyń 2024 jylǵy ósý boljamy 3,5-4,5 paıyzǵa deıin kóterilip, 2025 jylǵa 5,5-6,5 paıyz deńgeıinde saqtaldy. 2024 jyly jalpy ishki ónimniń ósýi iskerlik belsendilik ahýalynyń jaqsarýy aıasynda ishki suranyspen qamtamasyz etiledi.
«Biz 2025 jyly ekonomıkalyq ósimniń meıilinshe joǵarylaýy, kóbine, Teńiz Shevroıldaǵy óndiristiń ulǵaıýyna baılanysty munaı óndirýdi arttyrýdy josparlap otyrǵan Úkimet sharalarynyń arqasynda bolady dep boljaımyz. 2026 jyly munaı baǵasynyń stsenarıı boıynsha tómendeýi jáne boljamnyń alǵysharttary kezinde ósý qarqyny 3,5-4,5 paıyzdy quraıdy. Osy bul boljamdar elimizdiń Áleýmettik-ekonomıkalyq damý boljamy men Úkimettiń basqa da baǵdarlamalyq qujattaryna negizdelgenin atap ótkim keledi. Al qazirgi ýaqytta Úkimet pen basqa da memlekettik organdar ekonomıkanyń ósý qarqynyn arttyrý saıasatyna qatysty jańa sharalardy ázirlep jatyr. Osy saıasatty qalyptastyrýǵa jáne atalǵan sharalardy iske asyrýǵa qaraı bizdiń ınflıatsııa men jalpy ishki ónim týraly boljamdarymyz qaıta qaralýy múmkin», - dedi Tımýr Súleımenov.
