Tımýr Muratov: Dári-dármekpen qamtý — qoǵam densaýlyǵyn qorǵaýdyń negizgi faktory
ASTANA. KAZINFORM – Astanada «Qazaqstannyń Sheteldik ınvestorlar keńesi» qaýymdastyǵy men Densaýlyq saqtaý mınıstrligi birlesip uıymdastyrǵan «Qazaqstannyń dári qaýipsizdigin qamtamasyz etý: taldamalyq tásil jáne jańa syn-qaterler» taqyrybynda dóńgelek ústel ótti.
Іs-sharaǵa Densaýlyq saqtaý vıtse-mınıstri Tımýr Muratov, Sheteldik ınvestorlar keńesi» qaýymdastyǵynyń dırektory Janna Baıdasheva, «Hımfarm» AQ bas dırektory Adam Alekseıýk, Polsha Respýblıkasynyń Qazaqstandaǵy ýaqytsha senimdi ókili Mıhal Labenda myrza, professor Nıevada, doktor Land jáne doktor Ryhvalskı syndy spıkerler qatysyp, dári-dármekpen qamtamasyz etýdegi ornyqtylyqty arttyrýdy kózdeıtin júıeli sheshimder ázirleý, jergilikti óndiristi yntalandyrý jáne memleket pen jekemenshik sektor arasyndaǵy áriptestikti nyǵaıtý máselelerin talqylandy.
— Halyqty dári-dármekpen qamtamasyz etý — qoǵam densaýlyǵyn qorǵaý salasyndaǵy negizgi faktorlardyń biri. Qazirgi turaqsyzdyq jaǵdaıynda kóp memleket, sonyń ishinde AQSh pen Eýropa elderi de bar, dári-dármek qaýipsizdigin memlekettik saıasattyń mindetti elementi dep qarastyryp otyr, — dedi Densaýlyq saqtaý vıtse-mınıstri Tımýr Muratov.
«Qazaqstannyń Sheteldik ınvestorlar keńesi» qaýymdastyǵynyń dırektory Janna Baıdasheva densaýlyq saqtaý sektory ókilderiniń báriniń kúshin biriktirýdiń mańyzyn atap ótti.
— Talqylaýymyzdyń ózegi — jergilikti óndiristi damytý, otandyq kompanııalarmen tıimdi áriptestik tetikterin qalyptastyrý jáne ádil de teńgerimdi patenttik saıasat. Biz dári-dármekti memleket esebinen satyp alǵanda edáýir negizdi sheshim qabyldaýǵa múmkindik beretin medıtsınalyq tehnologııalardy saraptaý (HTA) sekildi quraldarǵa erekshe nazar aýdaramyz. Bizdiń ortaq maqsatymyz — ómirlik mańyzy bar ári sapaly dári-dármek eldiń kez kelgen óńirine, qajet ýaqytynda jáne ádil baǵamen jetip, oǵan turǵyndar qol jetkize alǵanyn qamtamasyz etý, — dedi ol.
Polsha djenerık óndirýshiler qaýymdastyǵynyń vıtse-prezıdenti, farmatsevtıkadaǵy quqyq salasy mamany Gjegoj Ryhvalskı ulttyq óndiristiń strategııalyq mańyzyna toqtaldy.
— Jergilikti óndiris — ómirlik mańyzy bar jáne asa qajet dári-dármekterdi turaqty túrde qamtamasyz etip otyrýdyń mańyzdy tetigi. Artyqshylyǵy — logıstıka tizbekterin qysqartyp, qor deńgeıin baqylaı alamyz, dári-dármek naýqasqa jaqyn jáne baǵa túzilýi ashyq bolady, — dedi Gjegoj Ryhvalskı.
Talqylanǵan taǵy bir mańyzdy taqyryp — dárihana jelilerine dári-dármek jetkizý turaqtylyǵy máselesi boldy.
Іs-shara qorytyndysy boıynsha jergilikti óndiristi damytý, farmatsevtıka ornyqtylyǵyn qoldaý jáne halyqaralyq tájirıbe almasýdy keńeıtýdi kózdeıtin birqatar usynys ázirlendi. Ol el Prezıdentiniń qaraýyna usynylyp, Sheteldik ınvestorlar keńesi aıasynda qarastyrylady.
Aıta ketelik Úkimet basshysy Oljas Bektenov Túrki memleketteri uıymy delegatsııasy basshylarymen jáne Dúnıejúzilik densaýlyq saqtaý uıymynyń densaýlyq saqtaýdy damytý máseleleri jónindegi óńirlik bıýrosynyń dırektorymen kezdesý ótkizdi.