Tımýr Muratov: Ekpe salǵyzý - árkimniń óz erkinde
NUR-SULTAN. QazAqparat – Tumaýǵa qarsy ekpe salǵyzý, jalpy vaktsınatsııa taqyryby halyq arasynda keń talqylanyp jatyr. Pikir ıeleri ekige jarylǵan: biri ony paıdaly, ekinshisi zııan deıdi. Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov osy rette turǵyndardyń suraqtaryna jaýap berip, tumaýǵa qarsy ekpeni ýaqytynda saldyrtýdyń mańyzdylyǵyn túsindirdi.
«Álemdegi barlyq vaktsınalar mindetti jáne erikti dep jikteledi. Halyq densaýlyǵy jáne densaýlyq saqtaý júıesi týraly Kodekske sáıkes bizdiń azamattarǵa arnalǵan vaktsınalar da dál solaı mindetti jáne erikti bolyp bólinedi. Kodekstiń 85-babyna sáıkes, bizdiń azamattar mindetti vaktsınalar tizimine engizilgen profılaktıkalyq ekpelerdi alýǵa mindetti ekendigi kórsetilgen. Halyqtyń epıdemııalyq ál-aýqatyn jaqsartý, sondaı-aq ınfektsııanyń aldyn alý maqsatynda Ulttyq vaktsınatsııalaý kúntizbesi bekitildi», - deıdi ol BAQ-qa taratqan aqparatynda.
Onyń aıtýynsha, vaktsına alýdy mindetti dep eshkim eseptemeýi tıis. Tumaýǵa qarsy vaktsınatsııa jergilikti meken-jaıy boıynsha tirkelgen alǵashqy medıtsınalyq-sanıtarlyq kómek uıymdarynda júrgiziledi. Vaktsınatsııa sozylmaly aýrýlary bar 18 jasqa deıingi balalarǵa, medıtsınalyq qyzmetkerlerge, júkti áıelderge (júktiliktiń 2-3 trımestri), jabyq mekemelerdegi adamdarǵa (balalar úıi, úı, ınternat), múgedek eresekter men sozylmaly aýrýlary bar balalarǵa jáne 60 jastan asqan qart adamdarǵa júrgiziledi.
«Qalaı desek te aqparattandyrylǵan kelisimge nemese vaktsınatsııadan bas tartýǵa quqyǵy patsıenttiń ózinde. Ekpe almaǵan balalar men eresekterdiń quqyqtaryn shekteıtin erejeler joq. Árıne, «vaktsınatsııaǵa qarsy» problema tek bizdiń memlekette ǵana emes. Adamzat tarıhynda vaktsınatsııadan bas tartý birneshe ret qaıǵyly nátıjelerge ákeldi. Eýropanyń birqatar elinde vaktsınatsııanyń toqtatylýymen baılanysty epıdemııanyń, vaktsınadan saqtanýǵa bolatyn aýrýlardyń órshigen jaǵdaılary kezdesti», - deıdi ol.
Foto: zheruiyq.kz