Tımýr Qulybaevty óziniń qyzmet babyn paıdalanyp, memleket múlkin jymqyrdy degen aıyptaýlar negizsiz - qarjy polıtsııasy
ASTANA. Naýryzdyń 19-y. QazAqparat /Aıdar Ospanalıev/ - «Muhtar Ábilıazovtyń Tımýr Qulybaevty óziniń qyzmet babyn paıdalanyp, memleket múlkin jymqyrdy degen aıyptaýlary eshqandaı negizsiz», dep málimdedi búgin Ekonomıkalyq qylmysqa jáne sybaılas jemqorlyqqa qarsy kúres agenttiginiń tóraǵasy Qaırat Qojamjarov. Bul týraly ol búgin jýrnalıstermen bolǵan arnaıy brıfıngte málim etti,
dep habarlaıdy QazAqparat.
Onyń málimetterine qaraǵanda, agenttik ókilderi M.Ábilıazovtan eldegi 15 munaı kompanııalarymen baılanysty zańsyz kelisimder jasalǵandyǵy jónindegi aryz-shaǵymyn qaraǵan. Onda M.Ábilıazov Qazaqstannyń «Qazenerdjı» munaı, gaz jáne energetıka keshenderin uıymdastyrý qaýymdastyǵynyń tóraǵasy Tımýr Qulybaevty laýazymyn paıdalana otyryp memleket múlkin jymqyryp, «QazMunaıGaz» aktsıonerlik qoǵamyna aktsııalardy belgilengen mejeden joǵary baǵamen satty dep aıyptaǵan. «Osyǵan oraı atalmysh másele boıynsha qazaqstandyq táýelsiz baǵalaýshy kompanııalardyń qatysýymen tekserý jumystary júrgizildi. Sonymen qatar atalmysh sharaǵa halyqaralyq ınvestıtsııalyq bankterdiń de materıaldary paıdalanyldy. Buǵan qosa aldynda atap ótilgen 15 kompanııanyń aktıvteriniń naryqtyq baǵasyn belgileý maqsatynda qosymsha saraptamalyq baǵalaý jumystary júrgizilip, memleket múlkin satý isine qatysatyn memlekettik organdardyń 60-tan astam basshylarynan túsinikteme alyndy. Nátıjesinde M.Ábilıazovtyń aryzynda kórsetilgen faktilerdiń eshqaısysy da rastalǵan joq», dedi agenttik tóraǵasy.
Onyń aıtýynsha, M.Ábilıazovtyń qorytyndylaryn jyl saıyn arnaıy aýdıt júrgizip otyratyn halyqaralyq uıymdar da joqqa shyǵaryp otyr. Al arnaıy tartylǵan mamandardyń qorytyndylary boıynsha memleket ıeligindegi kompanııalardyń aktsııalarynyń baǵasy zańsyz tómendetilgen degen aıyptaýlar eshqandaı negizsiz jáne dálelsiz. «Tekserý sharalary atalmysh kompanııalarmen kelisimderdiń sol ýaqyttaǵy naryq baǵamy men halyqaralyq kapıtal naryǵyndaǵy suranystyń jáne ulttyq kompanııanyń qarjylyq jaǵdaıyna baılanysty júrgizilgendigin kórsetti. Ol kelisimderdi júzege asyrý barysynda tek Qazaqstan zańdary ǵana emes halyqaralyq standarttar negizge alynǵan. Al M.Ábilıazov usynyp otyrǵan materıaldar atalmysh operatsııalardyń barysyn tolyq kórsete almaıdy. Aryzdanýshy bul qujattardyń arasynda tek óziniń kózqarasyna ǵana saı keletin bólikterin ǵana usynyp otyr», dedi Q.Qojamjarov.
