Tımýr Qulybaev jańa qyzmetke saılandy

ASTANA. QazAqparat - Tokıodaǵy Ulttyq olımpıada komıtetteri qaýymdastyǵynyń (UOKQ) Bas assambleıasynda Qazaqstannyń UOK basshysy Tımýr Qulybaev 2018-2022 jyldar aralyǵyna UOKQ Atqarý komıtetine múshe bolyp saılandy, dep habarlaıdy QazAqparat QR UOK-qa silteme jasap.  

Kandıdattar álemdegi 206 UOK arasynda qaraldy. Atqarý komıtetine qurlyqtyq qaýymdastyqtar usynǵan 24 olımpıadalyq qozǵalystyń sport fýnktsıoneri kiredi. Aıta ketý kerek, Tımýr Qulybaev qazirgi ýaqytta Azııa Olımpıada Keńesiniń vıtse-prezıdenti qyzmetin de atqarady. 

Mundaı jaýapty qyzmetke taǵaıyndalý - olımpıada qozǵalysynyń damýyna zor úles qosqanyn, óz elindegi sporttyń damýynda joǵary nátıjelerge qol jetkizgenin jáne sportshylardyń halyqaralyq arenada jetistikterdi baǵyndyrýyn kórsetedi. 

Eske sala keteıik, 28-29 qarashada Japonııa astanasynda jalpy sany eki júzden astam eldiń Ulttyq olımpıadalyq komıtetteriniń basshylary, álemdik sport uıymdarynyń basshylary men halyqaralyq sport federatsııalarynyń prezıdentteri kezdesti. Sporttyq forýmǵa jalpy esebi 1400-den asa adam qatysty. Bul osy jıynnyń tarıhyndaǵy rekordtyq kórsetkish. 

Ulttyq olımpıada komıtetteri qaýymdastyǵy (UOKQ) - 206 ulttyq olımpıadalyq komıtetiniń basyn biriktiretin, halyqaralyq Olımpıada Komıteti moıyndaǵan halyqaralyq uıym. Ol 5 qurlyqtyq birlestikterge bólip qarastyylady - Afrıka, Amerıka, Azııa, Eýropa jáne Okeanııa. UOKQ-nyń negizgi mindetteri - barlyq UOK-nyń ózara is-qımylyn qamtamasyz etý jáne jalpy máselelerdi sheshý, olımpıadalyq qozǵalysty jáne olımpıadalyq yntymaqtastyqty nyǵaıtýǵa, UOK arasynda Olımpıadalyq yntymaqtastyqty tıimdi túrde taratýǵa jáne Olımpıadalyq qozǵalystyń barlyq kórinisterinde kemsitýshilikti joıýǵa kómektesý úshin HOK jáne qurlyqtyq birlestiktermen yntymaqtasý.