Tımýr Qulybaev Vıtalıı Hýdıakov pen Ksenııa Romanchýkty júldelerimen quttyqtady
ASTANA. QazAqparat - Qazaqstan Ulttyq olımpıada komıtetiniń prezıdenti Tımýr Qulybaev ashyq sýda júzýshi Vıtalıı Hýdıakovty V Azııa jaǵajaı oıyndaryndaǵy jarqyn jeńisimen quttyqtady.
"Qurmetti Vıtalıı! Qazaqstan Respýblıkasy Ulttyq olımpıada komıteti jáne óz atymnan Sizdi Danangtaǵy V Azııa jaǵajaı oıyndarynda qol jetkizgen keremet jeńisińizben quttyqtaımyn. Sizdiń 5 jáne 10 shaqyrymdyq qashyqtyqta eshkimge des bermeı jeńis tuǵyrynan kórinýińiz jyldar boıǵy jattyǵýlar men maqsatqa jetýdegi tabandylyǵyńyzdyń aıqyn kórinisi. Men Sizge osynaý jetistigińiz úshin alǵys bildirip, sáttilik tileımin. Aldaǵy ýaqytta jarqyn jeńisterińiz kóp bolsyn!", - dep atap ótken T.Qulybaev.
Sondaı-aq, QR UOK prezıdenti Tımýr Qulybaev sportshy Ksenııa Romanchýkty V Azııa jaǵajaı oıyndaryndaǵy qola medalimen quttyqtady.
"Qurmetti Ksenııa! Danangtaǵy V Azııa jaǵajaı oıyndarynda jeńip alǵan qola medalińizben shyn júrekten quttyqtaımyn! Ashyq sýda júzý sportyndaǵy jarys óte tartysty ótetini málim. Úlken básekelestikke qaramastan, Siz jeńiske jetýge baryńyzdy salyp, Azııa qurlyǵyndaǵy úzdik úshtikke kire aldyńyz. Men Sizge halyqaralyq sporttyq arenalarda sáttilik pen jańa jeńister tileımin. Sizdi áli talaı ret jeńis tuǵyrynan kóremiz dep senemiz!", - delingen quttyqtaýda.
Esterińizge sala keteıik, qazaqstandyq sportshylar Vıtalıı Hýdıakov pen Ksenııa Romanchýk ashyq sýda júzý sportynan V Azııa jaǵajaı oıyndarynda taǵy eki medal jeńip aldy. Vıtalıı Hýdıakov bes shaqyrymdyq qashyqtyqta chempıon atansa, Ksenııa Romanchýk on shaqyrymda qola medal enshiledi. Buǵan deıin, Vıtalıı Hýdıakov on shaqyrymdyq básekede top jarǵan edi.
