Tımýr Qulybaev shańǵyshy Kolıadındi jeńisimen quttyqtady

ASTANA. QazAqparat - Qazaqstan Respýblıkasy Ulttyq Olımpıadalyq komıtetiniń prezıdenti Tımýr Qulybaev shańǵyshy Aleksandr Kolıadındi Ońtústik Koreıada ótip jatqan Paralımpıada oıyndarynda jeńip alǵan altyn medalimen quttyqtady, dep habarlaıdy QazAqparat  QR UOK-niń baspasóz qyzmetine silteme jasap.

Onda «Qurmetti Aleksandr! Qazaqstannyń Ulttyq Olımpıadalyq komıteti jáne elimizdiń sport qoǵamdastyǵy atynan Sizdi Phenchhandaǵy XІI qysqy Paralımpıada oıyndaryndaǵy jeńisińizben shyn júrekten quttyqtaımyn. Sizdiń altyn medalińiz Qazaqstan úshin tarıhı jeńis jáne bul jetistigińiz elimizdiń Paralımpıada sportynyń tarıhynda erekshe oryn alatyny sózsiz. Sizdiń maqsatqa jetý jolynda tanytqan qaırattylyq pen qaısarlyǵyńyz kópke úlgi. Shyn júrekten Sizdi, jattyqtyrýshylar quramyn jáne Qazaqstannyń Paralımpıada komıtetin osyndaı jetistikpen quttyqtaımyz!» dep jazylǵan.

Sondaı-aq, QR UOK prezıdenti Tımýr Qulybaev jaqyn kúnderi Phenchhanda Halyqaralyq Olımpıadalyq jáne Paralımpıadalyq komıtetteri arasynda ózara áriptestik týraly uzaq merzimge arnalǵan jańa kelisimge qol qoıylǵanyn da atap ótti.

«Bul sport qaǵıdalary men ıdealdaryn nasıhattaý isinde qos uıymnyń baǵdary bir ekenin dáleldeıdi. Qazaqstannyń Ulttyq Olımpıadalyq komıteti elimizde paralımpıadalyq qozǵalysty jáne ony damytýǵa baǵyttalǵan barlyq sharalardy qoldaıdy», - dedi T.Qulybaev.