Tımýr Qulybaev mektep oqýshylaryn kásipkerlik negizderine oqytýdy usyndy
QARAǴANDY. QazAqparat - Mektepter men kolledjderde «Kásipkerlik negizderi» degen jańa pán paıda bolýy múmkin, dep habarlaıdy «QazAqparat» HAA tilshisi.
Jańa pándi qalyptastyrý jaıly usynysyn «Atameken» ulttyq kásipkerler palatasy prezıdıýmynyń tóraǵasy Tımýr Qulybaev Qaraǵandydaǵy kásipkerler palatasynyń óńirlik keńesinde aıtty.
«Joǵarǵy synyptar men kolledj stýdentterine «Kásipkerlik negizderi» pánin oqytý qajet», - dedi Tımýr Qulybaev. «Atameken» ulttyq kásipkerler palatasy prezıdıýmynyń tóraǵasy bul saladaǵy bazalyq bilim jastardyń aıtarlyqtaı tabysqa ári jetistikke jetýine septigin tıgizetinin atap ótti. Sondaı-aq, kásipkerler kásibiniń órge domalaýyna kedergi keltiretin birqatar kúrdeli máselelerdi atady. Kóldeneń kedergiler tizimin jıyn barysynda óńirlik kásipkerler palatysynyń dırektory Ernar Kúlpeıisov atap berdi.
«Kásipkerlerdiń sheshilmeı kele jatqan júıeli máseleleriniń biri - bızneske beriletin jer ýchaskeleri jaıy, «jalǵan kásipkerlikten» zardap shegýshilerdiń kontragentterge tólenetin salyqtaryn esepteý, munaı bazasy jáne avtokólikterge janarmaı quıý stantsııalarynda esepteý baqylaý quraldaryn ornatýdy mindetteý», - dedi Ernar Kúlpeıisov.
Qaraǵandy oblysy deńgeıinde palataǵa jyl basynan beri kásipkerlerdi qorǵaý boıynsha 239 shaǵym kelip túsken. Atalǵan shaǵymdar boıynsha qorǵalǵan quqyqtar somasy 570 mıllıon teńgeden asty. Óńirlik keńes otyrysynyń qorytyndysynda atalǵan máselelerdi joıý boıynsha jobalyq sheshimder qabyldandy.
