Tımýr Qulybaev Lozannada UOKQ pen AOK prezıdentterimen kezdesti
ASTANA. QazAqparat - Halyqaralyq Olımpıada komıtetiniń astanasy Lozanna qalasynda (Shveıtsarııa) Qazaqstan Ulttyq Olımpıadalyq Komıtetiniń prezıdenti (UOK) Tımýr Qulybaev pen Ulttyq Olımpıadalyq komıtetter Qaýymdastyǵynyń (UOKQ) jáne Azııa Olımpıadalyq keńesiniń (AOK) prezıdenti sheıh Ahmad ál-Fahad ál-Sabahtyń ekeýara kezdesýi ótti, dep habarlaıdy QazAqparat tilshisi.
UOK-niń baspasóz qyzmeti málim etkendeı kezdesý 20 shildege deıin sozylatyn HOK Atqarýshy komıtetiniń kezekti otyrysy aıasynda ótti.
Ekijaqty kezdesý barysynda Indonezııada bir aıdan soń bastalatyn XVIII Jazǵy Azııa oıyndaryna daıyndyq barysy talqylandy. T. Qulybaev atalǵan keshendi jarysqa daıyndalý barysynda Qazaqstan UOK usynystaryna qoldaý kórsetkeni úshin alǵys bildirdi. Sondaı-aq, áńgime barysynda Qazaqstan komandasy dástúr boıynsha Qurlyq oıyndaryna kóp qurammen keletini aıtyldy. Bıyl 25 olımpıadalyq sport túri boıynsha 416 qazaqstandyq sportshy Azııa oıyndaryna qatysady dep josparlanýda.
2015 jyldan beri AOK vıtse-prezıdenti qyzmetin atqaratyn T. Qulybaev Azııa aımaǵyn halyqaralyq sport arenasynda tanytý úshin atalǵan uıymnyń úlken úles qosatynyn aıtyp ótti. Sheıh ál-Sabah óz kezeginde iri sporttyq jarystardy minsiz uıymdastyrǵan Qazaqstan tarapyn quttyqtap, AOK Ortalyq-Azııa aımaǵynyń damýyna atsalysyp otyrǵan Qazaqstan UOK-ne alǵys aıtty.
T. Qulybaevtyń aıtýynsha, aımaqtaǵy áriptestikti odan ári nyǵaıtý Qazaqstan UOK-niń halyqaralyq qyzmetindegi basty baǵyttarynyń biri bolmaq. 2018 jyldyń birinshi jartysynda Qazaqstan UOK ózge elderdegi áriptesterimen birlesken otyrystar jáne semınarlar ótkizip úlgerdi.
Sapar barysynda Qazaqstan UOK prezıdenti «Qazaqstan Respýblıkasy dene shynyqtyrý jáne sport týraly» jańa zańnyń olımpıadalyq komıtettiń qyzmetine jaqsy ózgerister ákelgenin aıtyp, eldegi olımpıadalyq qozǵalysty ári qaraı damytýdaǵy josparlarymen bólisti. UOKQ prezıdenti T. Qulybaevtyń sportty damytýdaǵy ulttyq federatsııalardyń rólin kúsheıtý týraly bastamasyn qoldady.
Ál-Sabahtyń sózinshe, bul tájirıbe basqa da UOK-terge qyzyqty bolmaq.
Eske sala keteıik, Tımýr Qulybaev Ortalyq-Azııa aımaǵy boıynsha AOK vıtse-prezıdent qyzmetin atqarady, sondaı-aq, Ulttyq Olımpıadalyq komıtetter Qaýymdastyǵy halyqaralyq qyzmetter boıynsha Komıssııasynyń jáne Halyqaralyq Olımpıada komıteti qoǵammen baılanys jáne Sport arqyly álemdi damytý Komıssııasynyń múshesi sanalady.
Aldaǵy Azııa oıyndary 18 tamyz ben 2 qyrkúıek arasynda Djakarta jáne Palembang qalalarynda ótedi. Atalǵan synǵa olımpıadalyq jáne olımpıadalyq emes 40 sport túri boıynsha qurlyqtyń 45 memleketinen 10 myńnan asa atlet qatysady dep kútilýde.
