Tımýr Qulybaev Halyqaralyq Olımpıada komıtetiniń prezıdentimen kezdesti
ASTANA. QazAqparat - Qazaqstan Olımpıadalyq komıtetiniń basshysy Tımýr Qulybaev Halyqaralyq Olımpıada komıtetiniń prezıdenti Tomas Bah myrzamen kezdesti. Resmı kezdesý XVIII jazǵy Azııa oıyndarynyń astanasy Djakarta qalasynda ótti. Bul týraly Qazaqstan UOK baspasóz qyzmeti habarlaıdy.
Sporttyq uıym basshylary áriptestikti nyǵaıtýǵa qatysty mańyzdy máselelerdi talqylap, 2020 jylǵy Tokıo Olımpıadasyna daıyndyq kezeńin áńgimeledi.
Azııa Olımpıadalyq Keńesiniń Ortalyq-Azııa aımaǵy boıynsha vıtse-prezıdenti sanalatyn T. Qulybaev álemdik olımpıada qozǵalysyndaǵy aımaqtyń róli artyp kele jatqanyn atap ótti. Sondaı-aq, kezdesý barysynda dopıngke qarsy saıasat pen «taza» sportshylardy qorǵaýǵa qatysty suraqtarǵa basa nazar aýdaryldy.
Qazaqstan UOK prezıdenti QR sport týraly zańyna ózgertýler engizilip, ulttyq federatsııalarǵa basymdyq berilgennen keıingi alǵashqy jartyjyldyqtyń nátıjelerimen bólisti.
«Qazaqstan UOK olımpıadalyq sport túrleri boıynsha ulttyq federatsııalardy saralaý júıesine sáıkes josparly jáne maqsatty túrde damytýdy bastady. Jańa zań qabyldanǵannan keıingi jarty jyl ishinde ózgerister tek bizdiń uıymǵa ǵana emes, Qazaqstandaǵy barlyq olımpıadalyq qozǵalysqa áser etti. Búginde federatsııalar óz sport túrlerindegi máselelerge tikeleı aralasyp, sportshylardyń daıyndyǵyn baqylaıdy. Bizdiń negizgi maqsatymyz - Qazaqstan qurama komandalaryna teńdeı jáne sapaly jaǵdaı jasaý. Bul uzaqqa sozylatyn is, dese de, zań qabyldanyp, alǵashqy qadam jasaldy. Jumys jańa sıpatqa ıe boldy. Keleshekte nátıjesin kóretinimizge senimdimin»,- dedi Tımýr Qulybaev.
Tomas Bah myrza Qazaqstan UOK prezıdentiniń ulttyq federatsııalardyń rólin arttyrý jónindegi bastamasyn tolyǵymen quptap, elimizde sportta damytýǵa jasalǵan qadamdardyń mańyzdylyǵyn atap ótti. Sonymen qatar, Halyqaralyq Olımpıada komıtetiniń prezıdenti Qazaqstan HOK-tyń halyqaralyq baǵdarlamalaryna belsendi qatysatynyna nazar aýdardy.
Kezdesý barysynda 6-18 qazan aralyǵynda Býenos-Aıreste (Argentına) ótetin jasóspirimderdiń jazǵy Olımpıada oıyndaryna Qazaqstan sportshylarynyń qatysýy týraly máseleler talqylandy. Atalǵan dúbirli dodada alpysqa jýyq jas atlet sporttyń 18 túrinen Qazaqstan namysyn qorǵaıdy. Odan bólek, Halyqaralyq Olımpıada komıteti «Olımpızmdi iske asyrý» halyqaralyq Olımpıadalyq forýmyn ótkizedi. Atalǵan forýmǵa álemdegi sporttyq uıymdardyń basshylary, sportshylar, BUU kóshbasshylary, memleket qaıratkerler men taǵy da kóptegen tulǵalar qatyspaq. Forým Olımpıadalyq qozǵalys pen sportty álemdi jaqsartýdyń quralyna aınaldyrýǵa qatysty suraqtardy ortaǵa tastaıtyn pikirtalas alańy bolmaq.
