Tımýr Qulybaev bızneske qarsy qylmystardy jeke qarastyrýdy usyndy

NUR-SULTAN. QazAqparat – Bızneske qarsy qylmystardy Qylmystyq kodekste jeke taraýǵa toptastyrý qajet. Bul týraly IV Bıznesti qorǵaý jónindegi forýmda «Atameken» Ulttyq kásipkerler palatasy Tóralqasynyń tóraǵasy Tımýr Qulybaev aıtty, dep habarlaıdy QazAqparat tilshisi.

«Bıznestiń problemasy laýazymdy tulǵanyń aralasýymen jıi bolyp jatady. Kásipkerler barlyq satyǵa jáne qoǵamdyq ınstıtýttarǵa júginýge májbúr. 2018 jyly ǵana 50 myńnan astam shaǵym tirkelip, 61 laýazymdy tulǵa tártiptik jazaǵa tartyldy. Yqpal etýdiń qylmystyq jáne ákimshilik sharalary is júzinde jumys istemeıdi. Barlyq jerde derlik nóldik statıstıka», - dedi ol.

Sonymen qatar, ol Memleket basshysynyń bıznestiń damýyna kedergi keltirýge tyrysý memleketke qarsy jasalǵan qylmys retinde qaralýy tıistigin aıtqanyn eske saldy.

«Quqyq qorǵaý organdary akademııasyn birlesip bul máseleni zeredeleýdi bastadyq. Bızneske qarsy jasalǵan qylmysty keshendi qarastyryp, keńeıtip Qylmystyq kodekstiń jeke taraýy retinde toptastyrý qajet dep sanaımyz. Bızneske erteńgi kúnine degen senimdilik, jeke menshigine qol suǵylmaıtyndyǵyna kepil kerek», - dedi Tımýr Qulybaev.

Osy oraıda Tóralqa tóraǵasy bul iste sot bıligi men sýdıalardyń mańyzdy ról oınaıtyndyǵyna nazar aýdardy.

«Joǵarǵy sottyń basshylyǵy sot protsedýralaryn jaqsartý, formalızmdi joıý, bıznes pen memlekettik apparat asyndaǵy daýlardaǵy teńsizdik alyp tastaý boıynsha belsendi sharalar qabyldap jatyr. Sýdıalar korpýsynyń sapasyn arttyrý boıynsha da jumys júrgizilýde. Kásipkerler qoǵamdastyǵy bul bastamalarǵa qoldaý kórsetedi», - dedi ol.