Tımýr Qulybaev Kazenergy basshylyǵynan ketip, ornyna Maǵzum Myrzaǵalıev saılandy
Qazaqstan munaı-gaz jáne energetıka kesheni uıymdary qaýymdastyǵynyń tóraǵasy qyzmetine Maǵzum Myrzaǵalıev saılandy, dep habarlaıdy Kazinform.
Bul sheshim 8 jeltoqsanda Almaty qalasynda ótken KAZENERGY keńesiniń otyrysynda qabyldandy.
KAZENERGY Qazaqstan munaı-gaz jáne energetıka kesheni uıymdarynyń qaýymdastyǵy munaı-gaz salasyndaǵy kásipkerlikti damytýdy qoldaý maqsatynda 2005 jyldyń 2 qarashasynda qurylǵan. Sodan beri oǵan kásipker Tımýr Qulybaev basshylyq jasap kelgen bolatyn.
Búginde qaýymdastyq munaı-gaz, elektr energetıkasy jáne atom ónerkásibi salalaryndaǵy kompanııalardy biriktiredi.
«Qaýymdastyqtyń maqsaty — álemde jáne elimizde energetıkalyq jáne ekologııalyq saıasattaǵy ózgermeli basymdyq jaǵdaıynda QR energetıka salasynyń (munaı-gaz jáne elektr energetıkasy) turaqty jáne teńgerimdi damýyna járdemdesý» deıdi kompanııanyń baspasóz qyzmeti.
Qaýymdastyq tóraǵasynyń laýazymy — qoǵamdyq jumys, oǵan jalaqy tóleý qarastyrylmaǵan.
