Tımýr Dosymbetovke «UIPM qurmetti múshesi» ataǵy berildi
ASTANA. QazAqparat - Halyqaralyq qazirgi bessaıys federatsııasynyń atqarýshy komıteti UIPM 70 jyldyǵyna arnalǵan saltanatty sharada qazaqstandyq Tımýr Dosymbetovti qurmet zalyna engizdi, dep habarlaıdy QazAqparat tilshisi.
QR Ulttyq olımpıadalyq komıtetiniń baspasóz qyzmeti habarlaýynsha, Lımasolda (Kıpr) UIPM-niń 70 jyldyǵyna arnalǵan Kongress ótti. Atalǵan jıynǵa Qazaqstan qazirgi bessaıys federatsııasynyń prezıdenti Berik Imashev qatysty.
Eki kúnge sozylǵan Kongress barysynda qazirgi bessaıystan ótetin jarys jospary anyqtaldy. Sondaı-aq, jyl qorytyndylanyp, úzdik bapkerler men sportshylar esimi ataldy.
Tımýr Dosymbetovtiń UIPM qurmet zalyna engizilýi Qazaqstan úshin aıtýly oqıǵa boldy. Dańqty sportshy elimizde qazirgi bessaıysty damytýǵa úlken úles qosqan bolatyn.
Dosymbetov 1982 jyly Rımde ótken álem chempıonatynda altyn medal ıelengen. Ol birneshe jyl boıy KSRO quramasynyń beldi sportshysy boldy.
QR UOK-niń alǵashqy prezıdenti KSRO-ǵa eńbek sińirgen sport sheberi ataǵynyń ıegeri. Odan bólek, halyqaralyq qazirgi bessaıys federatsııasy Atqarýshy komıteti men Azııa Olımpıada keńesi tehnıkalyq komıtetiniń múshesi, Qazaqstan qazirgi bessaıys federatsııasynyń vıtse-prezıdenti qyzmetin atqardy.
Tımýr Dosymbetov 2015 jyly qaıtys boldy. Oǵan ómirden ozǵan soń «UIPM qurmetti múshesi» ataǵy berildi.
