Tımýr Bekmambetovtyń stsenarııler baıqaýy bastaldy
ALMATY. 24 naýryz. QazAqparat /Áıgerim Ámir/ - Tanymal qazaqstandyq kınorejısser Tımýr Bekmambetovtyń stsenarııler baıqaýy bastaldy. Bul jaıly búgin Almatyda ótken baspasóz máslıhatynda málim boldy.
Baıqaýdyń basty maqsaty - daryndy jáne maqsatshyl jas rejısser, prodıýsser, stsenarısterdi taýyp olardy oqytý, sondaı-aq Qazaqstannyń kıno salasynyń damýyna dem berý bolyp tabylady.
Baıqaý ekinshi ret halyqaralyq «Astana» ekshn-fılmder kınofestıvali aıasynda ótip otyr. Eń úzdik bes joba shilde aıynyń 1-i men 5-i aralyǵynda festıval kezinde kórsetiletin bolady.
Uıymdastyrýshylar baıqaýǵa óz jumystaryn ótkizý úshin qatysýshylarǵa biraz jeńildikter qarastyrǵan. Stsenarıılerin ótkizý úshin olar tek eki-aq qujat toltyrýlary qajet. Alǵashqy betine qysqasha óz eńbekteriniń mazmunyn, al kelesi betke ózderi jaıly aqparat berýi kerek.
Baıqaýǵa bes eń úzdik degen jumystar alynatyn bolady. Solardyń biri qazaqstandyq jeńimpaz bolsa, basqalary shetelden kelip túsken suranystar boıynsha anyqtalady.
Jeńimpaz Tımýr Bekmambetovtyń «Bazelevs» kompanııasymen jumys isteý múmkindigine ıe bolady.
«Qazir kóptegen tyń ıdeıalar bolýy múmkin. Biraq, jastar ol jaıly jıi aıta bermeıdi. Biri jazyp, úıine qoıyp qoıýy múmkin, biri áli sheshimin taba almaı júrgen shyǵar. Mine, búgin úlken múmkindik týyp otyr. Osy festıval arkyly kóptegen jas daryndar óz týyndylaryn bizdiń elektrondy adresimizge joldaı alady. Keıin, jeńimpaz stsenarısterge habarlasyp, olarmen birge jumys isteıtin bolamyz. Avtorlyq quqyqtarynyń da saqtalýyn qadaǵalaımyz. Qazaqstandyq qatysýshylarǵa kıno mektebin bitirgeni týraly eshqandaı arnaıy qujat qajet etilmeıdi. Al, basqa memleketter úshin ol mindetti. Bul qazaqstandyq kıno salasyn damytýdaǵy basty maqsattardyń biri» - deıdi halyqaralyq «Astana» ekshn-fılmder kınofestıvaliniń Bas dırektory Iren Vanıdovskaıa.
