Tımýr Bekmambetovtiń kompanııasy Kerch oqıǵasy týraly fılm túsirip jatyr
MÁSKEÝ. QazAqparat - Tımýr Bekmambetovtiń «Bazelevs» kompanııasy 2018 jylǵy 17 qazanda Kerchte bolǵan qaıǵyly oqıǵa týraly fılm túsirip jatyr. Bul týraly sársenbide kompanııanyń baspasóz qyzmetine silteme jasap TASS agenttigi habarlady.
Fılmniń sıýjetine kolledjdiń 18 jastaǵy stýdenti Vladıslav Roslıakov uıymdastyrǵan qaıǵyly oqıǵa arqaý bolady. Eske sala keteıik, byltyr Kerchte kolledj stýdenti jasaǵan jarylys pen atys saldarynan qaza tapqandar sany 21 adamǵa jetken bolatyn.
«Fılm tek Roslıakovtiń ózi týraly ǵana emes, munda qaza tapqandar, oqytýshylar jáne oqýshylar týraly da áńgime bolady», - deıdi túsirilim tobynyń ókilderi.
Fılm screenlife formatynda túsiriledi. Kartına rejısseri - Leonıd Marantıdı. Onyń qashan úlken ekranǵa shyǵatyny áli belgisiz.
