Tımýr Bekmámbetov jarnama álemine oraldy - VIDEO
ASTANA. QazAqparat - Jarnama túsirýmen aınalysýdy qoıǵan belgili rejısser Tımýr Bekmámbetov «Donstroı» qurylys kompanııasy salyp jatqan jańa oramnyń jarnamasyn túsirdi. Grafıkanyń kómegimen shynaıy ómirdi kórsetetin mını-fılm «Astana júregi» dep atalady.
Atalǵan jarnamalyq klıp aǵymdaǵy jyldyń naýryz aıynda Frantsııanyń Kann qalasynda ótken MIPIM-2014 jyljymaıtyn múlik kórmesinde tanystyryldy.
«Astana júregi» mını-fılmi ádettegi jyljymaıtyn múlik týraly jarnamadan erekshelenedi. Sebebi, Bekmámbetovtiń týyndysynda qurylystyń «ıisi» sezilmeıdi. Naqty aıtqanda, onda turǵyn oramnyń jobasy, bezendirilýi, qabyrǵalary, tipti, ǵımarattyń ózi joq. Onyń ornyna jaqsy oqıǵalardyń obrazy, janǵa tynyshtyq beretin atmosfera seziledi. Osylaısha, avtor kórermenge óz maqsatyna jetip, baqytty bolýǵa septigin tıgizetin, úılesimdilik pen mahabbat syılaıtyn megapolısti kórsetti.
Tımýr Bekmámbetovtiń ózi jańa jarnamalyq týnydyny klıp degennen góri, art-joba dep sanaıdy.
«Bul kıno ma, álde jarnama ma? Shynymdy aıtsam, ózim de bilmeımin»,- dedi ol.
Sondaı-aq tapsyrys berýshi tarap - «Donstroı» qurylys kompanııasynyń bas dırektory Alena Derıabına Bekmámbetovtiń jumysy kóńilden shyqqanyn jasyrmady.
Aıta keterligi, «Astana júregi» - Bekmámbetovtiń jarnama álemindegi alǵashqy jobasy emes. Buǵan deıin ol reseılik jarnama naryǵynyń klassıkasyna aınalǵan birqatar rolıkterdiń avtory retinde tanylǵan. Olardyń qatarynda «Bank Imperıal. Búkilálemdik tarıh» atty jarnama bar, dep jazady Ýtro rý.
