Tımýr Bekmambetov: Men úshin Otanymda bul fılmniń qazaq tilinde kórsetilgeni mańyzdy
ALMATY. QazAqparat - Tımýr Bekmambetovtyń «Alǵashqylar dáýiri» fılmi Qazaqstan kınoteatrlarynda qazaq jáne orys tilinde kórsetiledi, dep habarlaıdy QazAqparat tilshisi.
Bul «Bazelevs» stýdııasynyń qazaq tiline aýdarylǵan alǵashqy fılmi.
«Men Qazaqstanda týyp, 17 jasyma deıin osynda turdym. Ol kezde fılmder qazaq tilinde múldem kórsetilmeıtin, sebebi aýdarylmaıtyn. Qazaq tiline kóp kóńil bólinbedi, sodan men mine, osyndaı ana tilinde sóıleı alatyn biraq, óte nashar sóıleıtin «durys emes» adam bolyp shyqtym. Sondyqtan, men úshin kórermenniń bul fılmdi meniń Otanymda tek orys tilinde emes, memlekettik tilde de kórgeni mańyzdy», - dedi kınokartına prodıýsseri Tımýr Bekmambetov.
Aıta keteıik, fılmge Gollıvýd fılmderi men mýltfılmderin qazaqsha sóıletip júrgen tájirıbeli akterlar dýblıaj jasady. «Bolashaq» Korporatıvti qorynyń qoldaýymen 2011 jyldan beri memlekettik tilde 18 sheteldik fılmge dýlbıaj jasaldy.
«Biz qysqa ýaqyt ishinde Evgenıı Mıronov, Konstantın Habenskıı somdaǵan tamasha rolderge dýblıaj jasaý qajet boldy. Eki apta, 15-20 kúnniń ishinde biz aýyr jumysty atqaryp shyqtyq. Túpnusqada kóretin kórermendeı qazaq tilinde de fılmnen áser alý úshin dýblıaj akterleri ekrandaǵy oryndaýshylarmen qatar rólde oınap shyǵýy kerek. Biz akterlarymyzdy kosmosta ózderi júrgendeı sezinýi úshin ábden daıyndadyq», - dedi dýblıaj rejısseri Aıjan Jamshıtova.
Onyń aıtýynsha, túpnusqadaǵy maǵynany berý úshin fılm aýdarmasyn eń myqty mamandar atqaryp shyqqan.
Fılm ómirde bolǵan oqıǵaǵa negizdelip túsirilgen. Onda 1965 jyly 18 naýryz kúni Alekseı Leonovtiń «Voshod-2» kemesimen ashyq ǵarysh keńistigine alǵash shyqqan tarıhı oqıǵasy baıandalady.
