Tımýr Bekmambetov qazaqstandyq stsenarıst Baqtııar Qadyrovtyń fılmine prodıýserlik etedi
ASTANA. 4 shilde. QazAqparat /Gúlmıra Álıakparova/ - Ekshn-fılmderdiń «Astana» ІІ halyqaralyq festıvali aıasynda ótken jas stsenarııshiler arasyndaǵy baıqaýda qazaqstandyq Baqtııar Qadyrov óziniń «Posle odnogo dnıa» fılminiń jobasymen jeńiske jetti.
Álemdik kıno óneriniń maıtalmandarynan quralǵan qazylar alqasyna ekshn-fılmderdiń «Astana» halyqaralyq festıvaliniń prezıdenti, rejısser jáne prodıýser Tımýr Bekmambetov tóraǵalyq etti. Baıqaýǵa álemniń túkpir-túkpirinen myńdaǵan jobalar usynyldy, aqtyq saıysqa olardyń tek beseýi ótti. Atap aıtqanda, Vartan Arýstamovtyń (Reseı) - «Motopsıh», Pol Bertınonyń (AQSh) - «Zlye sobakı», Rassel Devıdsonnyń (Ulybrıtanııa) - «Kanalızatsııa», Ivaılo Tontchevtyń (Bolgarııa) - «Sady razrýshenıı» jáne Lachezar Tontchevtyń (Bolgarııa) - «Sady razrýshenıı» fılm-jobalarynyń stsenarııleri. Qazaqstannan baıqaýǵa Ǵalııa Baıjanovanyń «Poka vse doma», Rústem Muhıttyń (Peresekaıa chertý», Vıtalıı Kıstanovtyń «Den kaznı», Erjan Esimhanovtyń «Terrıtorııa 17» jáne jeńimpaz Baqtııar Qadyrovtyń «Posle odnogo dnıa» jobalary qatysty.
«Bizge sheshimdi qabyldaý qıynǵa soqty. Jalpy, tańdaý jáne baǵa berý óte qıyn. Baıqaý ekinshi ret ótkizilip otyr. Ótken jyly jeńisti Los-Anjelestiń stsenarısi alǵan bolatyn. Bul joly, ekranda kórgimiz kelgen fılmniń tujyrymdamasyn Qazaqstannyń jas azamaty jazdy. Kelesi jyly sizderden stsenarııler men jańa ıdeıalar kóptep túsedi degen úmittemiz», - dedi T.Bekmambetov jýrnalıstermen ótken baspasóz máslıhatynda.
Endi B.Qadyrovtyń stsenarııi boıynsha Tımýr Bekmambetovtyń «Bazelevs» kınokompanııasy fılm túsiretin bolady.
Eske salaıyq, baıqaýdyń ótken jylǵy jeńimpazy óziniń ǵylymı-fantastıkalyq trıller janryndaǵy«Apollon 18» fılmimen Braıan Mıller atanǵan edi. T.Bekmambetovtyń aıtýynsha, «Astana» festıvalindaǵy jeńisinen keıin kıno-jobanyń túsirilimi kóp uzamaı bastalady. Kartına jospar boıynsha ústimizdegi jyldyń qyrkúıeginde amerıkalyq kórermenderge jol tartpaq.
