Tımýr Bekmambetov qazaqstandyq fılmderdi kórýge arnalǵan abonement engizýdi usyndy
ASTANA. QazAqparat - Otandyq kınoındýstrııany damytý úshin qazaqstandyq fılmderdi kórýge arnalǵan abonement engizý qajet. Búgin elordada ótken «Qazaqstandaǵy kınematografııany 2050 jylǵa deıin damytý tujyrymdamasy jobasyn talqylaý» taqyrybyndaǵy dóńgelek ústel otyrysynda tanymal rejısser Tımýr Bekmambetov osyndaı usynys jasady.
Onyń paıymynsha, otandyq kınolarǵa kirý baǵasy negizgi máselelerdiń biri bolyp otyr.
«Menińshe, bılet quny ınvestıtsııa sanyna sáıkes bolýy tıis. Eger qazaq fılminiń bılet baǵasy kórermender úshin qoljetimdi bolsa, onda kınoteatrlarda múldem bólek aýdıtorııany baıqaıtyn edik. Qazir kınoǵa jaǵdaı bar adamdar barady. Qazirgi belgilenip otyrǵan baǵa 920 teńge. Bul kınoǵa barǵysy keletin otbasy úshin qymbat bılet », - dedi T.Bekmambetov.
Osy oraıda rejısser tuıyqtan shyǵýdyń joly retinde qazaqstandyq fılmderdi kórýge arnalǵan abonement engizýdi usyndy.
«Abonement syndy ıdeıa kerek. Máselen árbir azamat ulttyq fılmderdi kórýge arnalǵan qandaı da abonement aldy deıik. Bul aıyna 10-15 fılm kórýge arnalsa ári tym tómen baǵaǵa. Sonda kınoteatrlarda múldem ózge aýdıtorııa paıda bolar edi», - dedi ol.
Sóz sońynda T.Bekmambetov búgingi talqylaýǵa usynylǵan Qazaqstandaǵy kınematografııany 2050 jylǵa deıin damytý tujyrymdamasy jobasyna qatysty óz pikirin bildirdi.
«Men Reseıde jumys isteıtindikten ahýal aıta qoıarlyqtaı ózgeshe emes. Mólsheri shamaly ózgesheleý. Biraq problemalar men mindetter túptep kelgende birdeı. Bizder úshin ázirlengen tujyrymdama óte saýatty ári jan-jaqty oılastyrylǵan. Aıtarlyqtaı ózgeris qosa alamyn dep aıta almaımyn. Barlyq negizgi máseleler men sheshý joldary qamtylǵan», - dep aıaqtady sózin ol.
