Tımýr Bekmambetov Denıs Tenniń kıno ıdeıasyn qalaı júzege asyrǵaly jatqanyn aıtty
ASTANA. QazAqparat - Rejısser ári prodıýser Tımýr Bekmambetov Denıs Ten tiri kezinde stsenarııin jazyp ketken «Kózsiz mahabbat» fılminiń túsiriliminiń qalaı júrgizilgeli jatqanyn aıtyp berdi, dep habarlaıdy QazAqparat tilshisi.
«Bizdiń kompanııada «Skrın Laıf» baıqaýy ótkizilip jatqan kezde Denıs Tenmen tanysqan edik. Onyń jumysy bizdiń qyzyǵýshylyǵymyzdy týdyryp, ony tildesýge shaqyrdyq. Sol kezde Denıspen tanystym. Meni sol kezde onyń jumysymen birge Denıstiń adamgershiligi de tamsandyrǵan edi. Sebebi, Denıstiń ashyqtyǵy men jarqyn beınesi kóz aldymda qalyp qoıdy. Ol baıqaýda jeńimpaz atanyp, Denıstiń usynǵan fılmin qashan jáne qalaı iske asyrý kerektigimizdi aqyldastyq ta. Qaıǵyly jaǵdaıǵa qaramastan, bul fılm báribir jaryqqa shyǵady», - dedi Tımýr Bekmambetov.
Rejısser óz sózinde qazirgi ýaqytta fılm daıyndyq satysynda turǵanyn atap ótti.
«Ol fılmniń túsirilim jumystary kelesi jyldyń basynda bastalady. Qańtar aıynan bastap iske kirisemiz. Fılm aǵylshyn tilinde túsiriledi. Qazirgi tańda rejısserlerdi tańdap jatyrmyz. Fılm Amerıkada shyǵarylady. Týyndy jastar arasyndaǵy mahabbatqa negizdelgen. Bizge qazirgi ýaqytta Denıs Ten qory qoldaý bildirip otyr. Qor fılmnyń shyǵarylýyna qatysty qarajattyń jartysyn jınady. ıAǵnı, jumys josparly túrde alǵa jyljı beredi», - deıdi ol.
Tımýr Bekmambetovtiń aıtýynsha, stsenarııge ózgerister tek qor músheleriniń kelisimimen engiziledi.
«Meniń jeke pikirim: bul fılm kommertsııalyq ónim emes, estelik retinde túsirilýi kerek. Sondyqtan, Denıs Ten jasap ketken týyndyny qaz-qalpynda jetkizgimiz keledi», - dedi ol.
Eske sala ketsek, Tımýr Bekmambetovtiń qaza tapqan qazaqstandyq mánerlep syrǵanaýshy, Sochıde ótken Olımpıada oıyndarynyń qola júldegeri Denıs Tenniń oılastyrǵan jobasyn júzege asyrýdy josparlap otyrǵanyn buryn da habarlaǵan bolatynbyz.
