Tımýr Avenov: Jańa Konstıtýtsııada adamnyń negizgi quqyqtary men tsıfrlyq quqyqtary birdeı qorǵalady
ASTANA. KAZINFORM – Ata zańnyń jańa jobasynda adam quqyqtary men bostandyǵy memlekettiń basty tiregi retinde aıqyndaldy. Bul týraly QR Ádilet mınıstrligi Zańnama jáne quqyqtyq aqparat ınstıtýty Zańnamanyń tıimdiligin taldaý bóliminiń basshysy Tımýr Avenov málimdedi.
– Konstıtýtsııanyń mátinindegi ózgeristerdi oqý jáne túsiný mańyzdy. Jańa nusqada adam quqyqtary men bostandyqtary memlekettiń basty basymdyǵy retinde belgilengen. Bul azamattardyń quqyqtyq sheshimderi endi naqty standarttarmen qorǵalatynyn bildiredi. Ekinshiden, ádildik, zań jáne tártip jańa Konstıtýtsııanyń negizgi tiregine aınaldy. Mundaı normalar zań shyǵarýshy jáne quqyq qorǵaýshy mamandar úshin mańyzdy baǵdar. Óıtkeni osy ózgerister quqyq júıesin sapaly ári ádil damytýǵa oń serpin beredi, - deıdi Tımýr Avenov.
Sarapshynyń pikirinshe, jańa Konstıtýtsııada adamnyń negizgi quqyqtarymen qatar tsıfrlyq jeke quqyqtary birdeı dárejede qorǵalady. Bul – jahandaný dáýirinde qoǵam úshin eń kerekti ózgeris.
- Azamattardyń tsıfrlyq ortadaǵy quqyqtaryn qorǵaý mańyzdy. Bul máseleniń Konstıtýtsııa deńgeıinde bekitilýi tsıfrlyq tehnologııalardyń qoǵam ómirinde aıryqsha mańyzǵa ıe bolǵanyn kórsetedi. Jeke derekterdiń qorǵalýy men tsıfrlyq qyzmetterdiń qaýipsizdigi – zamanaýı quqyqtyq júıeniń basty talaptarynyń biri. Sondyqtan mundaı normalardyń Ata zańda aıqyndalýy azamattardyń quqyqtaryn jańa dáýir talaptaryna saı qorǵaýdy kúsheıtedi, - deıdi maman.
Osy rette Tımýr Avenov Konstıtýtsııaǵa engizilgen ózgeristerdiń ýaqyt talabyna saı jasalyp jatqanyn da atap ótti. Onyń sózinshe, sońǵy jyldary elde ádildikke jáne sapaly memlekettik basqarýǵa degen suranys artqan. Sondyqtan tsıfrlyq zamanda qoǵamǵa túsinikti ári jaýapty erejeler qajet ekeniń málimdedi.
- Jańa Konstıtýtsııa jobasy kirispeden, 11 bólimnen jáne 95 baptan turady. Zańdy jańartý quqyqtyq jaýapkershilikti kúsheıtip, ekiushty normalardy joıady. Bul adam quqyqtaryn qorǵaýdy nyǵaıtyp, memlekettik ınstıtýttarǵa degen senimdi arttyrady. Osy turǵydan alǵanda, Konstıtýtsııanyń jańa redaktsııasy – jańa qoǵamnyń kórinisi. Ol azamattarǵa túsinikti bolyp, quqyqtyq tájirıbede tıimdi qoldanylýy tıis. Endi ózgertilip, bektilgen zańnyń bári naqty praktıkalyq nátıjede ǵana kórinedi, - deıdi ol.
Eske sala keteıik, Halyq usynysy eskerilip, Konstıtýtsııa jobasyna qosymsha normalar engizildi.
