Tımofeı Skatov Taılandtaǵy jarystyń jartylaı fınalyna ótti

ASTANA. KAZINFORM — Qazaqstandyq, álemniń 195-raketkasy Tımofeı Skatov Nonthabýrı (Taıland) chellendjer týrnıriniń jartylaı fınalyna shyqty.

Jarystyń 2-raketkasy bolyp tirkelgen qazaqstandyq tennısshi shırek fınalda álemniń 288-raketkasy, frantsııalyq Floran Bakspen oınady.

Qazaqstandyq tennısshi 6:2, 6:4 esebimen jeńiske jetti.

Saǵat jarymnan astam ýaqytqa sozylǵan básekede Skatov 3 eıspen birge 5 breık-poınttyń úsheýin paıdalandy. Baks 2 eıspen shekteldi.

Tımofeı Skatov fınalǵa shyǵý úshin álemniń 303-raketkasy, reseılik Marat Sharıpov nemese reıtıngide 373-oryndaǵy ıspanııalyq Pol Martın Tıffonnyń qaı jeńgenimen talasady.
Taǵy bir qazaqstandyq, álemniń 104-raketkasy Aleksandr Shevchenko Adelaıda (Aýstralııa) ATP 250 týrnıriniń shırek fınalynda reıtıngide 36-satydaǵy frantsııalyq Ýgo Ýmberge jol berdi — 0:6, 3:6.

Eske sala keteıik, budan buryn Anna Danılınanyń Aýstralııadaǵy jarystyń jartylaı fınalyna joldama alǵanyn jazǵan edik. 

Sondaı-aq qazaqstandyq tennısshilerdiń Aýstralııa ashyq birinshiligindegi qarsylastary anyqtaldy.