Tımofeı Skatov Shveıtsarııadaǵy jarystyń negizgi kezeńine ótti
ASTANA. KAZINFORM — Qazaqstandyq tennısshi, álemniń 172-raketkasy Tımofeı Skatov Gshtaad (Shveıtsarııa) ATP 250 týrnıriniń irikteý saıysyn sátti aıaqtady.
Qazaqstandyq sportshy irikteý saıysynyń fınalynda álemniń 198-raketkasy, ýkraınalyq Vıtalıı Sachkonyń mysyn basty.
Birinshi partııada 6:2 esebi tirkelse, Tımofeı ekinshi sette de esesin jibermedi – 6:4.
Bir saǵat 22 mınýtqa sozylǵan básekede Skatov 6 eıspen birge 6 breık-poınttyń teń jartysyn qur jibergen joq. Sachko 5 eıspen shekteldi.
Osylaısha, Tımofeı Skatov 13-19 shilde aralyǵynda ótetin negizgi jarysqa joldama aldy.
Gshtaad kortynda Qazaqstannyń birinshi jáne ekinshi raketkalary Aleksandr Býblık pen Aleksandr Shevchenko óner kórsetedi.
Dodanyń 1-raketkasy bolyp tirkelgen A.Býblık týrnırdi ekinshi aınalymnan bastaıdy.
Álemniń 99-raketkasy A.Shevchenko bastapqy kezdesýin reıtıngide 126-satydaǵy frantsııalyq Aleksandr Mıýllermen ótkizedi.
Ótken jyly munda A.Býblık jeńimpaz atanǵan bolatyn.
Eske sala keteıik, budan buryn Tımofeı Skatovtyń Shveıtsarııadaǵy týrnırde qarsylasyn bir saǵatta tize búktirgenin jazǵan edik.
Sondaı-aq Jibek Qulambaeva Rýmynııadaǵy týrnırdiń irikteý saıysyn jeńispen bastady.
