Tımofeı Skatov Shveıtsarııadaǵy týrnırde qarsylasyn bir saǵatta tize búktirdi
ASTANA. KAZINFORM — Qazaqstandyq tennısshi, álemniń 172-raketkasy Tımofeı Skatov Gshtaad (Shveıtsarııa) ATP 250 týrnıri irikteý saıysynyń fınalyna shyqty.
Іrikteý saıysynda 2-raketka bolyp tirkelgen Tımofeı Skatov úndistandyq Anırýd Chandrasekarmen betpe-bet keldi.
Qazaqstandyq tennısshi qarsylasyn qınalmaı jeńdi — 6:4, 6:2.
Bir saǵatta aıaqtalǵan básekede T.Skatov 3 eıspen birge 4 breık-poınttyń úsheýin óz esebine jazdy. Úndistandyq sportshy 2 eıspen shekteldi.
Tımofeı Skatov irikteý saıysynyń fınalynda álemniń 198-raketkasy, ýkraınalyq Vıtalıı Sachkomen oınaıdy. Ony utqan jaǵdaıda negizgi jarysqa joldama alady.
Júlde qory 612 620 eýroǵa baǵalanǵan atalmysh doda 13-19 shilde aralyǵynda ótedi.
Eske sala keteıik, budan buryn qazaqstandyq tennısshilerdiń Astana týrnıriniń fınalyna shyqqanyn jazǵan edik.
Sondaı-aq Arýjan Saǵyndyqova Astanadaǵy jarystyń fınalynda oınaıdy.
