Tımofeı Skatov Shymkenttegi týrnırde bas júlde úshin synǵa túsedi
ASTANA. KAZINFORM – Qazaqstandyq tennısshi, álemniń 198-raketkasy Tımofeı Skatov Shymkent chellendjer týrnıriniń fınalyna shyqty.
Jarystyń 1-raketkasy bolyp tirkelgen qazaqstandyq tennısshi jartylaı fınalda reıtıngide 325-oryndaǵy frantsııalyq Antýan Gıbodomen betpe-bet keldi.
Tımofeı birinshi sette 4:1 esebimen alǵa ketti. Sol basymdylyǵyn saqtap qala aldy – 6:2. Skatov ekinshi partııany da dál osyndaı eseppen aıaqtady - 6:2.
Bir saǵat 23 mınýtqa sozylǵan básekede T.Skatov 2 eıspen birge 12 breık-poınttyń beseýin paıdalandy. Gıbodo 3 eıs, 1 breıkpen (4 breık-poınt) kózge tústi.
Tımofeı Skatov fınalda chempıondyq ataqty álemniń 359-raketkasy, ózbekstandyq Sergeı Fomınmen sarapqa salady. Ol álemniń 285-raketkasy, bosnııalyq Andreı Nedıchti joldan taıdyrdy – 4:6, 6:1, 6:4.
Eske sala keteıik, budan buryn Arýjan Saǵyndyqovanyń Mysyrdaǵy jarystyń shırek fınalyna joldama alǵanyn jazǵanbyz.
Sondaı-aq Jibek Qulambaeva juptyq synda Qytaıdaǵy jarystyń fınalyna shyqty.
