Tımofeı Skatov Shanhaı masters týrnırin sátti bastady
ASTANA. KAZINFORM — Qazaqstandyq tennısshi, álemniń 210-raketkasy Tımofeı Skatov Shanhaı (Qytaı) ATR 1000 týrnıri irikteý saıysynyń fınalyna shyqty.
T.Skatov irikteýdiń jartylaı fınalynda álemniń 135-raketkasy, grekııalyq Stefanos Sakellarıdıske qarsy keldi.
Bul qos sportshynyń ózara alǵashqy kezdesýi edi.
Qazaqstandyq tennısshi eki sette 6:3, 6:2 esebimen basym tústi.
Saǵat jarymǵa jýyq ýaqytqa sozylǵan básekede Skatov 1 eıspen birge 12 breık-poınttyń tórteýin paıdalandy. Sakellarıdıs 5 eıs, 1 breıkpen (2 breık-poınt) erekshelendi.
Tımofeı Skatov irikteýdiń fınalynda álemniń 185-raketkasy, aýstralııalyq Bernard Tomıchpen oınaıdy. Ony jeńse, negizgi jarysqa joldama alady.
Taǵy bir qazaqstandyq, álemniń 111-raketkasy Aleksandr Shevchenko irikteý saıysynyń jartylaı fınalynda reıtıngide 218-oryndaǵy japonııalyq Iosıhıto Nısıokaǵa 2:6, 4:6 esebimen jol berdi.
Eske sala keteıik, budan buryn Rybakınanyń jaraqatyna baılanysty Qytaıdaǵy týrnırge qatysýdan bas tartqanyn jazǵan edik.
