Tımofeı Skatov Polshadaǵy jarystyń ekinshi aınalymyna ótti

ASTANA. KAZINFORM — Qazaqstandyq, álemniń 215-raketkasy Tımofeı Skatov Poznan (Polsha) chellendjer týrnırin sátti bastady.

Jarystyń 9-raketkasy T.Skatov alǵashqy aınalymda dúnıejúzilik reıtıngide 293-oryndaǵy moldovalyq Radý Albottan aılasyn asyrdy.

Qazaqstandyq tennısshi bıyl Býharest (Rýmynııa) ATP 250 týrnıriniń irikteý satysynda R.Albotty 6:1, 7:6 (7:3) esebimen utqan bolatyn.

Bul joly 1 saǵat 29 mınýtqa sozylǵan matchta Skatov 6:2, 6:4 esebimen jeńdi. 

Báseke barysynda T.Skatov 2 eıspen birge 7 breık-poınttyń beseýin paıdalandy. R.Albot 1 eıs, 2 breıkpen (4 breık-poınt) shekteldi.

Tımofeı Skatov shırek fınalǵa shyǵý úshin álemniń 342-raketkasy, chehııalyq Gınek Barton nemese reıtıngide 377-satydaǵy amerıkalyq Tobı Aleks Kodattyń qaı jeńgenimen talasady.

Taǵy bir qazaqstandyq, reıtıngide 270-oryndaǵy Denıs Evseev osy dodada alǵashqy aınalymda álemniń 129-raketkasy, argentınalyq Tıago Agýstın Tırantemen sheberlik baıqasady.

Eske sala keteıik, budan buryn 17 jasar Ámir Omarhanovtyń álemdik reıtıngide úzdik kórsetkishke qol jetkizgenin jazǵan bolatynbyz.

Sondaı-aq Pýtıntseva Nottıngem týrnırinde alǵashqy qarsylasyn aıqyn basymdylyqpen utty.

Aleksandr Býblık Germanııadaǵy týrnırde álemniń 1-raketkasymen kezdesýi múmkin.