Tımofeı Skatov Ispanııadaǵy Jırona týrnırin sátti bastady

ASTANA. KAZINFORM — Qazaqstandyq tennısshi, álemniń 175-raketkasy Tımofeı Skatov Jırona (Ispanııa) chellendjer týrnıriniń irikteý saıysyn sátti ótkizdi.

Іrikteýde birinshi raketka bolyp tirkelgen T.Skatov aldymen dúnıejúzilik reıtıngide 305-orynda turǵan frantsııalyq Artýr Geanyń meselin qaıyrdy — 6:2, 7:6 (8:6).

Qazaqstandyq tennısshi irikteý saıystarynyń fınalynda reıtıngide 609-satydaǵy Izraıl ókili Danıel Tsýkermandy tas-talqan qyldy — 6:0, 6:3.

Bir saǵat 23 mınýtqa sozylǵan báseke barysynda Skatov 8 breık-poınttyń altaýyn óz esebine jazdy. 

Tımofeı Skatovtyń negizgi týrnırde álemniń 103-raketkasy, bolıvııalyq Ýgo Delennen ótýge tyrysyp kóredi. 

Taǵy bir qazaqstandyq, álemniń 258-raketkasy Denıs Evseev bastapqyda eki saǵatqa jýyq ýaqytqa sozylǵan tartysty kezdesýde reıtıngide 304-oryndaǵy ıspanııalyq Nıkolas Alvares Varonany tize búktirdi — 7:5, 7:6 (7:4). Alaıda D. Evseev irikteý saıystarynyń fınalynda álemniń 209-raketkasy, aýstrııalyq Lýkas Noımaıerge ese jiberdi — 1:6, 0:6.

Negizgi jarysta Qazaqstannyń ekinshi, álemniń 98-raketkasy Aleksandr Shevchenko bastapqy kezdesýinde-aq jeńilip qaldy. Dodanyń 2-raketkasy bolyp tirkelgen ol alǵashqy aınalymda reıtıngide 207-satydaǵy lıvandyq Bendjamın Hassanǵa jol berdi — 4:6, 6:1, 4:6.

Eske sala keteıik, budan buryn Beıbit Juqaevtyń Meksıkadaǵy jarysta qarsylasyn aıqyn basymdylyqpen utqanyn jazǵan bolatynbyz.