Tımofeı Skatov Ispanııadaǵy týrnırde jergilikti tennısshini jeńdi
ASTANA. KAZINFORM — Qazaqstandyq tennısshi, álemniń 188-raketkasy Tımofeı Skatov Valensııa (Ispanııa) ATP 175 týrnıri irikteý saıysynyń fınalyna ótti.
Іrikteý saıysynyń 2-raketkasy bolyp tirkelgen qazaqstandyq sportshy bastapqy kezdesýin ATP reıtıngisinde 504-orynda turǵan ıspanııalyq Karlos Lopes Montagýdpen ótkizdi.
Tartysty ótken matchta Tımofeı 6:3, 7:6 (7:5) esebimen jeńiske jetti.
Eki saǵat 9 mınýtqa sozylǵan básekede Skatov 5 eıspen birge 6 breık-poınttyń teń jartysyn óz esebine jazdy. Jergilikti sportshy 6 eıs, 2 breıkpen (8 breık-poınt) kózge tústi.
Osylaısha, irikteý saıysynyń fınalynda Tımofeı Skatov álemniń 258-raketkasy, germanııalyq Genrı Skvaırmen oınaıdy. Ony jeńse, negizgi týrnırge ótedi.
Valensııada 12-17 mamyr aralyǵynda bolatyn atalmysh dodanyń júlde qory 272 720 eýroǵa baǵalanǵan. Jarys jeńimpazy 43 635 eýroǵa qosa 175 reıtıngilik upaıǵa qol jetkizedi.
Sondaı-aq taǵy bir qazaqstandyq, álemniń 391-raketkasy Jibek Qulambaeva Parma (Italııa) chellendjer týrnırine joldama aldy. Ol irikteý saıysynda WTA reıtıngisinde 459-oryndaǵy argentınalyq Nıkol Fossa-Ýergony aıqyn basymdylyqpen utty – 6:1, 6:4.
Endi Jibek negizgi jarystyń alǵashqy aınalymynda álemniń 211-raketkasy, germanııalyq Anna-Lena Frıdzammen sheberlik baıqasady. Oǵan qosa J.Qulambaeva N.Fossa-Ýergomen juptyq synda da óner kórsetedi.
Eske sala keteıik, budan buryn Elena Rybakınanyń Rım týrnıriniń tórtinshi aınalymyna joldama alǵanyn jazǵan edik.
Elena Rybakına bıylǵy maýsymda biregeı kórsetkishke qol jetkizdi.
Sondaı-aq Anna Danılına Rım týrnıriniń 1/8 fınalyna shyqty.
