Tımofeı Skatov Astana Open týrnıriniń alǵashqy aınalymynan asa almady
NUR-SULTAN. QazAqparat – Qazaqstandyq Tımofeı Skatov Astana Open ATP 250 týrnıriniń alǵashqy aınalymynan asa almady, dep habarlaıdy QazAqparat tilshisi.
Dúnıejúzilik reıtıngte 438-orynda turǵan 19 jastaǵy T.Skatov jarysqa arnaıy shaqyrtýmen qosylǵan edi.
Qarsylasy, álemniń 98-raketkasy, 21 jastaǵy fınlıandııalyq Emıl Rýýsývýorı elordadaǵy irikteý saıysynda jeńimpaz atanǵandardyń biri bolatyn.
Birinshi partııada fın sportshysy 3:0 esebimen alǵa ketti. T.Skatov bir breık jasap, esepti qysqartqanymen, sol qarqynyn jalǵastyra almady. E.Rýýsývýorı setti taǵy bir breıkpen bitirdi – 6:2.
Ekinshi sette fın tennısshisi qazaqstandyqqa birde-bir geım bergen joq – 6:0.
E.Rýýsývýorıdiń aıqyn basymdylyǵymen ótken báseke 1 saǵatqa sozyldy.
Sondaı-aq Andreı Golýbev pen Aleksandr Nedovesov juptyq synda týrnırdiń 2-raketkasy bolyp tirkelgen aýstralııalyqtar Maks Persell men Lıýk Sevıllden 4:6, 4:6 esebimen jeńilis taýyp, alǵashqy aınalymnan asa almady.
Osylaısha óz elimizde ótip jatqan jarysta qazaqstandyq tennısshiler sátsiz oınap, jarys jolynan shyǵyp qalyp jatyr. Endigi úmit Qazaqstannyń birinshi jáne ekinshi raketkalary Aleksandr Býblık pen Mıhaıl Kýkýshkınde ǵana. Birinshi aınalymda A.Býblık amerıkalyq Makkenzı Makdonaldpen, M.Kýkýshkın argentınalyq Federıko Delbonıspen kezdesedi.
Eske sala keteıik, budan buryn Dmıtrıı Popkonyń tartysty matchta utylyp qalǵanyn jazǵan bolatynbyz.
