Times Higher Education-QS agentiginiń baǵalaýy boıynsha Eýrazııa Ulttyq ýnıversıteti álemniń eń úzdik 500 ýnıversıtetiniń qataryna kirip otyr

Bul rette reıtıng agenttigi álemniń 15 myńǵa tarta oqý oryndaryna baǵalaý jasaǵan. Búgin QR Parlamenti Májilisiniń jalpy otyrysynda depýtat Amanjan Jamalov osylaı málim etti, dep habarlaıdy QazAqparat.

«Sońǵy ýaqytta birqatar BAQ elimizdiń bilim jáne ǵylym júıesin birshama synǵa alyp otyrǵanyn baıqaýǵa bolady. Degenmen, jaqynda táýelsiz halyqaralyq sarapshylardyń jarııalaǵan reıtıngtik nátıjelerine qazaqstandyq joǵary oqý ornynyń da iligýi qýantty. Eýrazııa ulttyq ýnıversıtetiniń rektory da bul faktini rastap otyr. Atap aıtqanda, atalǵan ýnıversıtet Times Higher Education-QS agenttiginiń reıtıngi boıynsha álemniń eń úzdik 500 ýnıversıteti qatarynan oryn aldy. Toqtala ketetin jaıt, bul baǵalaý dúnıejúziniń 15 myńnan astam ýnıversıtetterine júrgizilgen eken», dedi depýtat. Onyń aıtýynsha, osy faktiniń ózi otandyq joǵary bilim berý júıesiniń laıyqty damyp otyrǵanyn bildiredi. Óıtkeni, halyqaralyq retıngke TMD keńistiginen Máskeý memlekettik ýnıversıteti, Sankt-Peterbor memlekettik ýnıversıteti sekildi bedeldi 5 JOO ǵana engen. Solardyń biri Eýrazııa Ulttyq ýnıversıteti bolyp otyr. Depýtattyń sózine qaraǵanda, reıtıng agenttigi álemdegi kompanııalar men ýnıversıtetter arasyndaǵy sarapshylar men qyzmetkerlerden ınteraktıvti saýalnama júrgizip, nátıjesin sońǵy eki jyl boıy jınaqtaǵan.

«Bul rette jetkilikti qarjylandyrý bolsa, qazaqstandyq joǵary oqý orny bilim berý salasyndaǵy álemdik kóshbasshylar qatarynan kórinetinine de senimmen qaraýǵa bolady. Óıtkeni, EUÝ bıýdjeti úzdik tanylǵan ýnıversıtetterdiń bıýdjetimen salystyrǵanda tym tómen», dedi A. Jamalov.