Time jýrnalynyń Reseıdegi burynǵy arnaıy tilshisi Barak Obamanyń jańa baspasóz hatshysy boldy
ASTANA. 28 qańtar. QazAqparat - Time jýrnalynyń Reseıdegi burynǵy arnaıy tilshisi 45 jastaǵy Djeı Karnı AQSh Prezıdenti Barak Obamanyń jańa baspasóz hatshysy atandy.
Aq úı basshysy búgin osyndaı sheshim qabyldady, dep habarlaıdy RBK agenttigi Associated Press agenttigine silteme jasap.
D.Karnı Time jýrnalynda 20 jyl boıy jumys istegen, 1990-1993 jyldary Reseıdegi arnaıy tilshisi bolǵan. Ol KSRO-nyń ydyraýymen baılanysty oqıǵalar týraly jarııalap, jazǵan. D.Karnı orys tilinde erkin sóıleıdi.
Endi ol Barak Obamanyń 2012 jyly ótetin saılaýaldy naýqany kezinde Aq úıdiń resmı ókili retinde jumys isteıtin bolady.
D.Karnı baspasóz hatshylyǵyna B.Obamamen 2004 jyldan beri jumys istep kele jatqan Robert Gıbbstiń ornyna kelip otyr. R.Gıbbs AQSh Prezıdenti ákimshiliginiń keńesshileriniń biri bolady.
